मुंंबई (विशेष प्रतिनिधी) : मुंबई महानगरपालिकेतील उपनगरीय रुग्णालयांमध्ये डायलेसीस केंद्र सुरु करण्यात येत असून बोरीवलीतील क्रांतीज्योती सावित्रीबाई फुले रुग्णालय, बोरीवलीतील भगवती रुग्णालय, कांदिवलीतील डॉ बाबासाहेब आंबेडकर रुग्णालय, मुलुंडमधील एम. टी. रुग्णालय आणि घाटकोपर येथील राजावाडी रुग्णालया आदी ठिकाणी डायलेसीसची सुविधा दिली जाणार आहे. याबाबतच्या प्रस्तावाला सुधार समितीच्या बैठकीत मंजुरी देण्यात आली आहे.
एखाद्या रुग्णाची किडनी खराब झाल्यास त्याच्या शरीरात निर्माण होणारा विषारी धोका टाळण्यासाठी आणि रुग्णांचे प्राण वाचवण्यासाठी डायलेसीस करणे भाग पडत असून याचा खर्च बऱ्याच रुग्णाला आणि त्यांच्या कुटुंबाला पेलला जात नाही. त्यामुळे महापालिकेच्या रुग्णालयांमध्ये डायलेसीसची सुविधा उपलब्ध करून देण्याची मागणी अनेक वर्षांपासून महापालिकेकडे होत आहे. याची दखल घेत महापालिका आरोग्य विभागाने उपनगरातील पाच रुग्णालयांमध्ये ही सुविधा उपलब्ध करून देण्याचा निर्णय घेतला आहे. पश्चिम उपनगरातील तीन आणि पूर्व उपनगरातील दोन अशाप्रकारे पाच उपनगरीय रुग्णालयांमध्ये डायलेसीसची सुविधा उपलब्ध करून देण्यासाठी रुग्णालयांमध्ये जागा उपलब्ध करून देण्यात येणार आहे. यामध्ये महापालिकेच्या रुग्णांना केंद्राच्या योजनेतून मोफत डायलेसीसची सुविधा दिली जाणार आहे तसेच जे योजनेत बसणार नाही त्यांना सवलतीच्या दरामध्ये याठिकाणी डायलेसीसची सुविधा असेल असे प्रशासनाने स्पष्ट केले आहे.
बोरीवलीतील महानगरपालिकेच्या क्रांतिज्योती सावित्रीबाई फुले रुग्णालय, भगवती रुग्णालय, मुलुंडमधील म. तु. अगरवाल रुग्णालय, कांदिवलीतील भारतरत्न डॉ. बाबासाहेब आंबेडकर रुग्णालय, घाटकोपरमधील राजावाडी रुग्णालय आदी ५ उपनगरीय रुग्णालयांमध्ये या डायलेसीस केंद्राची सुविधा सार्वजनिक खाजगी सहभाग प्रोत्साहन प्रकल्पांतर्गत प्रत्येकी दहा याप्रमाणे तीस वर्षांसाठी दिली जाणार आहे.
बोरीवली पूर्व क्रांतीज्योती सावित्रीबाई फुले रुग्णालय
संस्थेचे नाव : ऐपेक्ष किडनी केअर प्रा. लि.
वार्षिक भाडे : ४.२०,००४ रुपये
बोरीवली हरीलाल भगवती रुग्णालय
संस्थेचे नाव : मुक्ता किडनी अँड डायलेसिस सेंटर (ओपीसी) प्रा. लि.
वार्षिक भाडे : १२,००,०१२ रुपये
मुलुंड म.तु.अगरवाल रुग्णालय
संस्थेचे नाव : मुक्ता किडनी अँड डायलेसिस सेंटर (ओपीसी) प्रा. लि.
वार्षिक भाडे : ७,२०,००० रुपये
कांदिवली भारतरत्न डॉ. बाबासाहेब आंबेडकर रुग्णालय
संस्थेचे नाव : ऐपेक्ष किडनी केअर प्रा. लि.
वार्षिक भाडे : ४,२०,००४ रुपये .
घाटकोपर राजावाडी रुग्णालय
संस्थेचे नाव : ऐपेक्ष किडनी केअर प्रा. लि.
वार्षिक भाडे : ४,२०,००४ रुपये