मुंबई : पक्षाची भूमिका आक्रमकपणे मांडण्यासाठी भाजप प्रदेशाध्यक्ष रवींद्र चव्हाण यांनी बुधवारी महाराष्ट्र प्रदेश प्रवक्ते आणि विभागीय प्रसिद्धी प्रमुखांच्या नावाची अधिकृत घोषणा केली. यामध्ये अनुभवी नेत्यांसोबतच नव्या दमाच्या कार्यकर्त्यांना संधी देत पक्षाने २३ प्रवक्त्यांची मोठी फौज मैदानात उतरवली आहे.
प्रदेश प्रवक्त्यांच्या यादीत विश्वास पाठक, प्रमोद जठार, अजित चव्हाण, अवधूत वाघ, गणेश खणकर, श्वेता शालिनी, शिवराय कुलकर्णी, राम कुलकर्णी, अतुल शाह, विनोद वाघ, गणेश हाके आणि कुणाल टिळक यांचा समावेश आहे. यासोबतच विनायक आंबेकर, राजीव पांडे, पंकज मोदी, आसिफ भामला, जितेन गजारिया, प्रमोद राठोड, प्रीती गांधी, शिवानी दाणी, अजय पाठक, लक्ष्मण सावजी आणि समीर बाकरे अशा अनुभवी नेत्यांकडेही प्रवक्तेपदाची जबाबदारी सोपवण्यात आली आहे.
स्थानिक स्तरावरही पक्षाचा प्रचार आणि प्रसिद्धी प्रभावी व्हावी, यासाठी सात विभागांमध्ये 'विभागीय प्रसिद्धी प्रमुख' नियुक्त करण्यात आले आहेत. यामध्ये कोकण विभागाची धुरा सतीश धारप यांच्याकडे, तर ठाणे विभागाची जबाबदारी दीपेश म्हात्रे यांच्याकडे सोपवण्यात आली आहे. पालघरसाठी समीर पाटील, पूर्व विदर्भासाठी कल्पना नालस्कर, पश्चिम विदर्भासाठी अन्नू शर्मा, उत्तर महाराष्ट्रासाठी गोविंद बोरसे आणि पश्चिम महाराष्ट्र विभागासाठी संजय मयेकर यांची नियुक्ती करण्यात आली आहे.
