कोलकाता : कोलकाता नाईट रायडर्सने राजस्थान रॉयल्सला चार गडी राखून पराभूत करून आयपीएल २०२६ मध्ये आपला पहिला विजय नोंदवला. केकेआरसाठी हा हंगाम चांगला गेला नाही, पण रिंकू सिंग आणि अनुकूल रॉय यांनी सातव्या विकेटसाठी भक्कम भागीदारी करून केकेआरला विजय साकारुन दिला. प्रथम फलंदाजी करताना, राजस्थानने २० षटकांत नऊ विकेट्स गमावून १५५ धावा केल्या. प्रत्युत्तरात, केकेआरने १९.४ षटकांत सहा विकेट्स गमावून १६१ धावा करत सामना जिंकला.
लक्ष्याचा पाठलाग करताना केकेआरची फलंदाजी खराब झाली आणि संघाने ८५ धावांत सहा विकेट्स गमावल्या होत्या. जोफ्रा आर्चरने पहिल्याच चेंडूवर टिम सेफर्टला बाद केले आणि त्यानंतर दुसऱ्या षटकात नंद्रे बर्गरने कर्णधार अजिंक्य रहाणेला बाद केले. केकेआरचे दोन्ही सलामीवीर आपले खाते उघडण्यात अपयशी ठरले. त्यानंतर संघाने नियमित अंतराने कॅमेरॉन ग्रीन (२७), अंगक्रिश रघुवंशी (१०), रोव्हमन पॉवेल (२३) आणि रमणदीप सिंग (१०) यांच्या विकेट्स गमावल्या.
रिंकू सिंग या मोसमात धावा करण्यासाठी झगडत होता. पण त्याला मोक्याच्या क्षणू सूर गवसला. रिंकू केकेआरसाठी फिनिशर म्हणून ओळखला जातो आणि राजस्थानविरुद्ध तो त्यात यशस्वी ठरला. सहा विकेट्स गमावल्यानंतर, रिंकू सिंगने अनुकूल रॉयसोबत मिळून सातव्या विकेटसाठी ३७ चेंडूंमध्ये ७६ धावांची नाबाद भागीदारी केली. आयपीएलमध्ये यशस्वी धाव-पाठलाग करताना सातव्या किंवा त्यापेक्षा खालच्या क्रमांकावरील फलंदाजाने केलेली ही दुसरी सर्वोच्च भागीदारी आहे.
रिंकू सिंगने अर्धशतक झळकावले आणि संघाला विजय मिळवून दिल्यानंतरच तो पॅव्हेलियनमध्ये परतला. केकेआरसाठी रिंकू सिंगने ३४ चेंडूंमध्ये पाच चौकार आणि दोन षटकारांसह नाबाद ५३ धावा केल्या. यशस्वी धाव-पाठलागात सहाव्या क्रमांकावर फलंदाजी करताना केकेआरची ही चौथी सर्वोच्च धावसंख्या आहे. दरम्यान, अनुकूल १६ चेंडूंमध्ये एक चौकार आणि दोन षटकारांसह २९ धावांवर नाबाद राहिला. राजस्थानसाठी रवींद्र जडेजाने दोन विकेट्स घेतल्या, तर जोफ्रा आर्चर, नंद्रे बर्गर, रवी बिश्नोई आणि यशराज पुंजा यांनी प्रत्येकी एकेक विकेट घेतली.
तत्पूर्वी, राजस्थानचा कर्णधार रियान परागने नाणेफेक जिंकून प्रथम फलंदाजी करण्याचा निर्णय घेतला. वैभव सूर्यवंशी आणि यशस्वी जैस्वाल यांनी राजस्थानला आश्वासक सुरुवात करून दिली. या दोन फलंदाजांनी पॉवरप्लेमध्ये केकेआरला एकही धाव करू दिली नाही आणि पहिल्या विकेटसाठी ८१ धावांची भागीदारी केली. राजस्थानकडून वैभव सूर्यवंशी आणि यशस्वी जैस्वाल यांनी शानदार फलंदाजी केली, तर इतर कोणताही फलंदाज मोठी खेळी करू शकला नाही. वैभवने सहा चौकार आणि दोन षटकारांच्या मदतीने २८ चेंडूंमध्ये ४६ धावा केल्या, तर यशस्वी चार चौकार आणि दोन षटकारांच्या मदतीने २९ चेंडूंमध्ये ३९ धावा करून बाद झाला. या दोघांव्यतिरिक्त केवळ शिमरॉन हेटमायर (१२) आणि रियान पराग (१२) यांनाच दुहेरी आकडा गाठता आला. राजस्थानने एक आव्हानात्मक धावसंख्या उभारली होती. पण रिंकू आणि अनुकूलने त्यांच्या हातून विजय हिसकावून घेतला. केकेआरकडून कार्तिक त्यागी आणि वरुण चक्रवर्ती यांनी प्रत्येकी तीन विकेट्स घेतल्या. सुनील नरेनला दोन विकेट्स घेण्यात यश आलं.