इस्लामाबाद : इस्रायल,अमेरिका आणि इराण यांच्यातील युद्ध २८ एप्रिल २०२६ रोजी पश्चिम आशियात सुरू झाले. या संघर्षानंतर, पाकिस्तानच्या मध्यस्थीने ८ एप्रिल रोजी दोन आठवड्यांची तात्पुरती शस्त्रसंधी स्थापित करण्यात आली. अमेरिका आणि इराण या दोन्ही राष्ट्रांमधील एक अत्यंत महत्त्वाची बैठक शनिवारी इस्लामाबादमध्ये होणार आहे. अमेरिकन उपराष्ट्रपती इराणसोबत चर्चेसाठी पाकिस्तानात रवाना झाले आहेत. मात्र, इराणचे शिष्टमंडळ अद्याप पाकिस्तानात दाखल झाले नसल्याने युध्दविरामाची चर्चा अनिर्णित राहणार आहे. इराणने खेळी करू नये, प्रामाणिकपणे चर्चा करावी, अशी प्रतिक्रिया अमेरिकेने दिली आहे.
इस्रायलचा लेबनॉनवरील हल्ला, होर्मुझच्या सामुद्रधुनीवरील वाद, इराणच्या १०-कलमी योजनेला दिलेला नकार आणि शांतता चर्चेभोवतीची अनिश्चितता यामुळे परिस्थिती अधिकच गुंतागुंतीची झाली आहे. इराणने पाकिस्तानातील चर्चेसाठी आपले पथक पाठवण्यास नकार दिला आहे.
अमेरिका आणि इराण यांच्यातील शस्त्रसंधीचे कायमस्वरूपी शांततेत रूपांतर करण्यासाठी पाकिस्तानची राजधानी इस्लामाबाद येथे शनिवारी महत्त्वपूर्ण चर्चा होणार आहे. दरम्यान, पाकिस्तानचे संरक्षण मंत्री ख्वाजा आसिफ यांनी इस्रायलवर केलेल्या तीव्र वक्तव्यामुळे प्रादेशिक तणाव आणखी वाढला असून, इस्रायलने पाकिस्तानवर जोरदार टीका केली आहे.
इराणचा पाकिस्तानवर विश्वास राहिलेला नाही, असे वृत्त इराणीमधील 'फर्स न्यूज एजन्सी'ने दिले आहे. त्यामुळे इराणने पाकिस्तानमधील शस्त्रसंधी करारात सहभागी होण्यास नकार दिला आहे. लेबनॉनमध्ये शस्त्रसंधी लागू होईपर्यंत वाटाघाटी करणार नाही, असे इराणने म्हटले आहे. दरम्यान, लेबनॉनवरील इस्रायली हल्ले अव्याहतपणे सुरू आहेत.
पाकिस्तानचे संरक्षणमंत्री ख्वाजा आसिफने इस्रायलला मानवतेवरील शाप म्हटले आहे. तो म्हणाला की, इस्रायलने गाझा, इराण आणि आता लेबनॉनमधील निष्पाप नागरिकांवर नरसंहार केला आहे. आसिफने प्रार्थना केली, "ज्यांनी हा देश निर्माण केला, ते नरकात जळोत."त्यानंतर, इस्रायलच्या पंतप्रधानांच्या कार्यालयाने हे वक्तव्य अत्यंत आक्षेपार्ह असल्याचे म्हटले आणि सांगितले की, हे इस्रायलच्या अस्तित्वालाच आव्हान देणारे आहे, विशेषतः अशा वेळी जेव्हा पाकिस्तान शांतता चर्चेत मध्यस्थ असल्याचा दावा करत आहे. परिणामी, ख्वाजा आसिफला त्याची एक्स पोस्ट डिलीट करावी लागली.
मिळालेल्या माहितीनुसार, लेबनॉनमध्ये इस्रायलकडून सुरू असलेल्या हल्ल्यांमुळे इराण नाराज आहे आणि याच कारणामुळे त्यांनी वाटाघाटींच्या संदर्भात कठोर भूमिका घेतली आहे. आतापर्यंत, या बैठकीत सहभागी होण्याबाबत त्यांच्याकडून कोणतेही स्पष्ट संकेत मिळालेले नाहीत. यापूर्वी, इराणचे शिष्टमंडळ पाकिस्तानात दाखल झाल्याचे सुचवणारे काही अहवाल समोर आले होते; तथापि, इराणच्या प्रसारमाध्यमांनी त्यानंतर हे दावे फेटाळून लावले. हे नमूद करणे महत्त्वाचे आहे की, अमेरिका आणि इराण यांच्यात दोन आठवड्यांच्या युद्धविरामाबाबत ८ एप्रिल रोजी एक करार झाला होता.