मॉस्को : ऑर्थोडॉक्स इस्टरनिमित्त रशियाने युक्रेनमध्ये ३२ तासांचा तात्पुरता युद्धविराम जाहीर केला. शनिवारी दुपारी ४ वाजल्यापासून रविवारी मध्यरात्रीपर्यंत लागू राहील. हा निर्णय युक्रेनचे राष्ट्राध्यक्ष वोलोडिमिर झेलेन्स्की यांच्या प्रस्तावानंतर आला असून, रशियाने आपल्या सैन्याला हल्ले रोखण्याचे आदेश दिले आहेत.
रशियाच्या परराष्ट्र मंत्रालयाने प्रसिद्ध केलेल्या माहितीनुसार, रशियाचे अध्यक्ष व्लादिमीर पुतिन यांनी शुक्रवारी पहाटे दोन दिवसांच्या कालावधीसाठी युद्धविरामाची घोषणा केली. “ऑर्थोडॉक्स इस्टरच्या येऊ घातलेल्या सणाच्या निमित्ताने, ११ एप्रिल रोजी दुपारी चार वाजल्यापासून ते १२ एप्रिल रोजी दिवसअखेरपर्यंत युद्धविराम जाहीर करण्यात येत आहे,” असे क्रेमलिनच्या घोषणेत म्हटले आहे. रशियाच्या परराष्ट्र मंत्रायलायने याबाबातची माहिती प्रसिद्ध केली आहे.
गेल्या चार वर्षांपासून रशिया आणि युक्रेनमध्ये भीषण युद्ध सुरु आहे. दोन्ही देशांमध्ये अमेरिकेच्या माध्यमातून वाटाघाटी सुरु आहेत. डोनाल्ड ट्रम्प यांच्या माध्यमातून यासाठी वाटाघाटी सुरु होत्या. पण, अमेरिका इराणबरोबर युद्धात अडकल्याने या चर्चांना लगाम लागला. मध्यपूर्वेतील संघर्ष शस्त्रसंधीमुळे थंडावला असताना रशिया आणि युक्रेन यांच्यातील युद्धविरामाला देखील महत्व प्राप्त झाले आहे. पुतिन यांनी ३२ तासांसाठी जाहीर केलेल्या युद्धविरामाला युक्रेनचे राष्ट्राध्यक्ष व्लादिमीर झेलेन्स्की यांच्याकडूनही ग्रीन सिग्नल मिळाला आहे. झेलेन्स्की यांनी ऊर्जा पायाभूत सुविधांवर हल्ले थांबवण्याचा प्रस्ताव दिला होता, ज्याला रशियाने सकारात्मक प्रतिसाद दिला. रशियाने युद्धविरामाचे पालन करण्याचे आदेश दिले आहेत, आणि युक्रेनकडूनही तशीच अपेक्षा व्यक्त केली आहे. यापूर्वीही अनेकदा युद्धविराम करण्याचे प्रयत्न झाले आहेत, परंतु त्यांना मर्यादित यश मिळाले होते. दरम्यान, पुतिन यांनी गेल्यावर्षी देखील ३० तासांसाठी युद्धविरामाची घोषणा केली होती. त्याचधर्तीवर यावर्षी देखील ऑर्थोडॉक्स इस्टरच्या निमित्ताने हा युद्धविराम जाहीर करण्यात आला आहे. रशिया आणि युक्रेन दोन्ही देशांमध्ये ऑर्थोडॉक्स इस्टरचे मोठे महत्व आहे.