उत्तर प्रदेशातील प्रयागराज येथे आज म्हणजेच गुरुवार ९ एप्रिल रोजी अतीक अहमदचा (Gangster Atiq Ahmed) ड्रायव्हर, मोहम्मद इरफान, याची दिवसाढवळ्या गोळ्या घालून हत्या करण्यात आली. मिळालेल्या माहितीनुसार, ही घटना प्रयागराज मधील केली येथील बिस्मिल्लाह चौकाजवळ घडली.
नेमकं काय घडलं ?
मिळालेल्या माहितीनुसार, बिस्मिल्लाह चौकाजवळ इरफान चहा पित असताना हा हल्ला झाला. चेहऱ्यावर रुमाल बांधलेले चार हल्लेखोर दोन मोटरसायकलवरून आले होते. त्यापैकी एकजण खाली उतरला आणि थेट इरफानच्या छातीत गोळी झाडली. गोळीबार होताच परिसरात घबराट पसरली आणि आरोपी घटनास्थळावरून फरार झाले.
घटनेची माहिती मिळताच पोलीस तात्काळ घटनास्थळी दाखल झाले. जखमी अवस्थेत इरफानला रुग्णालयात नेण्यात आले, मात्र डॉक्टरांनी त्याला मृत घोषित केले. या घटनेमुळे स्थानिकांमध्ये भीतीचे वातावरण निर्माण झाले आहे.
तपासात असे समोर आले आहे की, मोहम्मद इरफान हा अतीक अहमदच्या भावाशी संबंधित होता आणि पूर्वी तो त्याच्यासोबत राहत तसेच गाडी चालवत असे. दरम्यान, या हत्येमुळे इरफानच्या कुटुंबावर दुःखाचा डोंगर कोसळला असून, त्याचे कुटुंबीय रुग्णालयात आक्रोश करताना दिसले.
आसिफ दुर्रानी आणि त्याच्या भावावर संशय :
या प्रकरणात कुटुंबीयांनी आसिफ दुर्रानी आणि त्याच्या भावावर संशय व्यक्त केला आहे. प्राथमिक माहितीनुसार, इरफान आणि आसिफ यांच्यात मालमत्तेच्या व्यवहारावरून वाद होता आणि त्यातूनच ही हत्या झाल्याची शक्यता वर्तवली जात आहे.
सीसीटीव्ही फुटेजच्या आधारे हल्लेखोरांची ओळख पटवणार :
पोलीसांनी या प्रकरणी गुन्हा दाखल केला असून, आरोपींचा शोध सुरू आहे. सीसीटीव्ही फुटेजच्या आधारे हल्लेखोरांची ओळख पटवण्याचे काम सुरू आहे. डीसीपी यांनी सांगितले की, आरोपींना पकडण्यासाठी विशेष पथके तयार करण्यात आली आहेत आणि लवकरच त्यांना अटक केली जाईल.
सध्या या घटनेचा अधिक तपास सुरू असून, कायदेशीर कारवाई वेगाने केली जात आहे.