Png And Lpg Gas Cylinder : PNG असेल तर LPG होणार बंद? 1 जुलैपासून या नव्या नियमांची होणार अंमलबजावणी

मुंबई : घरगुती गॅस वापराबाबत केंद्र सरकारकडून महत्त्वाचे बदल लागू करण्याची तयारी सुरू असल्याची माहिती समोर येत आहे. विशेषतः ज्या भागात पाइपद्वारे नैसर्गिक वायू (PNG) सुविधा उपलब्ध आहे, त्या ठिकाणी LPG गॅस सिलिंडरच्या वापरावर निर्बंध आणण्याचा निर्णय घेतला गेल्याची चर्चा आहे.

PNG असलेल्या भागात LPG वर मर्यादा

नव्या नियमानुसार, ज्या परिसरात PNG कनेक्शन उपलब्ध आहे, त्या ठिकाणी LPG गॅस सिलिंडरचा पुरवठा टप्प्याटप्प्याने बंद केला जाणार आहे. 1 जुलैपासून अशा भागात LPG मिळणार नाही आहे. त्यामुळे संबंधित ग्राहकांना PNG कडे वळावे लागणार आहे

दुहेरी कनेक्शन असणाऱ्यांना सूचना

ज्या ग्राहकांकडे सध्या LPG आणि PNG दोन्ही कनेक्शन आहेत, त्यांना LPG कनेक्शन बंद करण्याच्या सूचना देण्यात आल्याची माहिती आहे. 1 जुलैनंतर अशा घरांमध्ये LPG पुरवठा थांबवला जाऊ शकतो, त्यामुळे PNG वापरणे बंधनकारक होण्याची शक्यता आहे. या पार्श्वभूमीवर, दोन्ही कनेक्शन वापरणाऱ्या ग्राहकांची माहिती संबंधित यंत्रणांकडून मागवण्यात आली आहे. यावर आधारित पुढील कारवाई केली जाणार असल्याचे सांगितले जात आहे.

PNG कनेक्शनसाठी अटी आणि खर्च

घराच्या 300 मीटर परिसरात PNG लाईन उपलब्ध असल्यास, ग्राहकांना आठवडाभरात कनेक्शन मिळू शकते. यासाठी साधारणतः काही हजार रुपयांपर्यंतचा खर्च अपेक्षित आहे. त्यामुळे नवीन कनेक्शन घेण्यासाठी ग्राहकांनी तयारी ठेवावी लागणार आहे.

राज्यातील प्रमुख शहरांमध्ये सुविधा

मुंबई, ठाणे, नवी मुंबई आणि पुण्यासारख्या शहरांमध्ये PNG सुविधा आधीपासून उपलब्ध आहे. मात्र अनेक ठिकाणी PNG असतानाही नागरिक LPG सिलिंडरचा वापर करत आहेत. या पार्श्वभूमीवरच हा निर्णय घेतला गेला आहे.

काळ्या बाजारावर नियंत्रणाचा प्रयत्न

गॅस सिलिंडरच्या वाढत्या दरांमुळे आणि काळ्या बाजारातील व्यवहारांमुळे सरकारकडून कडक पावले उचलली जात आहेत. घरगुती LPG चा पुरवठा सुरळीत असल्याचा दावा केला जात असला, तरी काही ठिकाणी काळ्या बाजारात जास्त दराने विक्री होत असल्याच्या तक्रारी आहेत. हा प्रकार रोखण्यासाठी PNG ला प्रोत्साहन दिले जात आहे. एकूणच, या नव्या नियमांमुळे घरगुती गॅस वापराच्या पद्धतीत मोठा बदल होण्याची शक्यता आहे.