पुणे : पुणे जिल्ह्यातील मावळ (Maval) तालुक्यात घडलेल्या एका दुर्दैवी अपघाताने खळबळ उडाली आहे. बास्केटबॉल खेळताना लोखंडी स्टॅन्ड कोसळून एका विद्यार्थ्याचा मृत्यू झाल्याची घटना समोर आली असून, या प्रकरणामुळे सुरक्षेच्या उपाययोजनांवर प्रश्नचिन्ह उपस्थित झाले आहे.
इंदोरी येथील तोलानी मेरीटाईम इन्स्टिट्यूटमध्ये ही घटना घडली. विशाल वर्मा (वय 20) असे मृत विद्यार्थ्याचे नाव असून तो बी. टेकच्या दुसऱ्या वर्षात शिक्षण घेत होता. अपघात इतका गंभीर होता की त्याचा जागीच मृत्यू झाला आहे.
नेमकी घटना कशी घडली?
घटनेबाबत वेगवेगळे दावे
या दुर्घटनेनंतर नेमकी घटना कशी घडली याबाबत दोन भिन्न मते समोर येत आहेत. प्रत्यक्षदर्शींच्या म्हणण्यानुसार, खेळ सुरू असताना अचानक स्टॅन्ड कोसळला. तर महाविद्यालय प्रशासनाच्या मते, संबंधित विद्यार्थी रिंगला लटकून व्यायाम करत होता आणि त्यावेळी स्टॅन्ड त्याचे वजन सहन करू शकला नाही.
विद्यार्थ्यांमध्ये संतापाचे वातावरण
घटनेनंतर संस्थेतील विद्यार्थ्यांमध्ये संतापाची लाट उसळली आहे. सुरक्षेच्या उपाययोजनांमध्ये निष्काळजीपणा झाल्याचा आरोप काही विद्यार्थ्यांकडून केला जात आहे. तसेच जखमी अवस्थेत रुग्णालयात हलवण्यात विलंब झाल्याचाही आरोप पुढे येत आहे.
कुटुंबावर दुःखाचा डोंगर
या घटनेची माहिती मिळताच विशालचे आई-वडील अयोध्याहून पुण्यात दाखल झाले. शिक्षणासाठी घरापासून दूर गेलेल्या मुलाचा अशा प्रकारे अपघाती मृत्यू झाल्याने कुटुंबावर मोठा आघात झाला आहे. परिसरातही हळहळ व्यक्त केली जात आहे.
