Mohammed Shami : ज्याच्या निवृत्तीच्या चर्चा रंगला त्यानेच...; झहीर खानला पछाडत शमीने रचला नवा विक्रम!

आयपीएल २०२६ स्पर्धेत रविवारी (५ एप्रिल) डबल हेडर सामन्यांचा थरार रंगला असून हैदराबादच्या मैदानावर झालेल्या सामन्यात लखनऊ सुपर जायंट्स (Lucknow Super Giants) संघाने दमदार सुरुवात केली. कर्णधार रिषभ पंत (Rishabh Pant) याने नाणेफेक जिंकत प्रथम गोलंदाजी करण्याचा निर्णय घेतला आणि गोलंदाजांनी तो सार्थकी लावला.

या सामन्यात मोहम्मद शामी (Mohammed Shami) याने अप्रतिम कामगिरी करत इतिहास रचला. त्याने अवघ्या ४ षटकांत केवळ ९ धावा देत २ बळी घेतले. त्याची इकॉनॉमी २.२० इतकी प्रभावी होती. या कामगिरीमुळे तो लखनऊसाठी ४ षटकांच्या स्पेलमध्ये सर्वात कमी धावा देणारा गोलंदाज ठरला.

गेल्या काही महिन्यांपासून मोहम्मद शामीच्या निवृत्तीची चर्चा रंगल्या होत्या. मात्र त्याने आयपीएलच्या १९ व्या हंगामातील पहिल्या दोन सामन्यांमध्येच आपल्या गोलंदाजीच्या जोरावर निवृत्तीच्या चर्चांना चोख उत्तर दिलं आहे.

Shamifesting more wickets 🧿 pic.twitter.com/UwhVVxIM1b

— Lucknow Super Giants (@LucknowIPL) April 5, 2026

शमीने आपल्या स्पेलची सुरुवातच आक्रमक पद्धतीने केली. पहिल्याच षटकात त्याने अभिषेक शर्मा (Abhishek Sharma) याला बाद केले, तर पुढील षटकाच्या पहिल्याच चेंडूवर स्फोटक फलंदाज ट्रॅव्हिस हेड (Travis Head) याला माघारी पाठवले. यापूर्वीच्या सामन्यात त्याने के एल राहुल (KL Rahul) याला पहिल्याच चेंडूवर बाद केले होते. या कामगिरीमुळे त्याने पॉवरप्लेमध्ये सर्वाधिक विकेट्स घेण्याच्या यादीत जाहीर खान (Zaheer Khan) याला मागे टाकत सातव्या स्थानावर झेप घेतली. या यादीत भुवनेश्वर कुमार (Bhuvneshwar Kumar) अव्वल स्थानावर आहे.

☝️ Abhishek Sharma ☝️ Travis Head Vintage #MohammadShami! #SRH’s dangerous duo is gone, and #LSG are off to a great start! 🔥#TATAIPL 2026 | #SRHvLSG | LIVE NOW 👉 https://t.co/X6t7Rxs79d pic.twitter.com/CnjvNzYwqv

— Star Sports (@StarSportsIndia) April 5, 2026

विशेष म्हणजे, शमी मागील हंगामात सनरायझर्स हैद्राबाद (Sunrisers Hyderabad) संघाचा भाग होता. २०२५ मध्ये त्याचा फॉर्म खराब राहिला होता. त्याने ९ सामन्यांत फक्त ६ विकेट्स घेतल्या होत्या. त्यामुळे त्याला ट्रेडद्वारे एलएसजीमध्ये आणण्यात आले. मात्र, यंदा त्याने आपल्या जुन्याच संघाविरुद्ध शानदार कमबॅक करत सर्वांना प्रभावित केले.

दरम्यान, एलएसजीचे मालक संजीव गोएंका (Sanjiv Goenka) सामना पाहण्यासाठी स्टेडियममध्ये उपस्थित होते. शमीची घातक गोलंदाजी पाहून त्यांनी तिरुपती बालाजींचा फोटो डोक्याला लावत आनंद व्यक्त केल्याचा व्हिडीओ व्हायरल होत आहे.