Sunday, April 5, 2026

BMC : मुंबईसाठी तब्बल १३,५०० मोठ्या आकाराच्या कचरा पेट्यांची खरेदी

BMC : मुंबईसाठी तब्बल १३,५०० मोठ्या आकाराच्या कचरा पेट्यांची खरेदी

सार्वजनिक कचरा पेट्यांची संख्या कमी करताना या ठेवणार कुठे?

मुंबई : मुंबईतील मोठ्या आकाराच्या कचरा कुंड्या हटवून रस्त्यांवरील सार्वजनिक कचरा कुंडयांचे संख्या कमी केली जात असतानाच आता महापालिका प्रशासन तब्बल १३ हजार ५०० कचरा कुंड्यांची खरेदी करणार आहे. त्यामुळे या मोठ्या आकाराच्या कचरा कुंड्यांचा वापर नक्की कुठे होणार आहे हा प्रश्न उपस्थित होत आहे.

मुंबई महापालिकेच्यावतीने सध्या २४० लिटर क्षमतेच्या कचरा पेट्यांची खरेदी करण्यात येत असून या कचरा पेट्यांसाठी मागवलेल्या निविदेमध्ये पात्र ठरलेल्या प्रायमा प्लास्टिक्स लिमिटेड कंपनीची निवड करण्यात येत आहे. त्यामुळे तब्बल २०३९ दराने २४० लिटर क्षमतेच्या या १३,५०० कचरा पेट्यांची खरेदी केली जाणार आहे. यासाठी तब्बल पावणे तीन कोटी रुपये खर्च केले जाणार आहेत. स्थायी समितीची मान्यता मिळण्यास अजुन काही कालावधी लागेल यासाठी घनकचरा व्यवस्थापन विभागाने तातडीची बाब म्हणून २४५२ कचरा पेट्यांच्या खरेदीचे आदेशही बजावले आहेत.

घनकचरा व्यवस्थापन विभागाच्या अधिकाऱ्यांच्या म्हणण्यानुसार, महापालिकेच्या शाळा,रुग्णालये आणि विभाग कार्यालये आदींकडून कचरा पेट्यांची मागणी झाल्यामुळे याची खरेदी करण्यात येत आहे. तसेच महापालिकेने खरेदी केलेल्या कॉम्पॅक्टर्समध्ये या बंदिस्त कचरा पेट्या उचलण्याची व्यवस्था आहे. या कचरापेट्या या कॉम्पॅक्टर्सद्वारे सहजपणे उचलता येतात व रिकाम्याही करता येतात, त्यामुळे आता २४० लिटर्स क्षमतेच्या कचरा पेट्यांची खरेदी केली जात आहे,असे स्पष्ट केले.

Comments
Add Comment
प्रहार ई-पेपर
हे पण पहा
संबंधित बातम्या आणखी वाचा >