मुंबई : मुलुंड येथील २१ वर्षीय गिर्यारोहक सानिका जिगर शाह एव्हरेस्ट सर करण्याच्या महत्त्वाकांक्षी मोहिमेसाठी सज्ज झाली आहे. ती ९ एप्रिल रोजी मुंबईहून काठमांडूसाठी रवाना होणार असून जगातील सर्वोच्च शिखर सर करण्याचा तिचा मानस आहे.
शनिवारी भाजप आमदार मिहीर कोटेचा यांनी सानिकाला शुभेच्छा देत तिच्या क्षमतेवर विश्वास व्यक्त केला. सानिकाचे शिखर सर करण्याचे स्वप्न पूर्ण होवो. ती केवळ मुंबईतच नव्हे तर संपूर्ण देशातील तरुणांसाठी एक आदर्श आहे, असे आमदार मिहीर कोटेचा म्हणाले.
गेल्या साडेचार वर्षांत सानिकाने गिर्यारोहण क्षेत्रात उल्लेखनीय कामगिरी करत आपली ठळक छाप पाडली आहे. तिच्या जिद्द, सहनशक्ती आणि तांत्रिक कौशल्याचे आमदार मिहिर कोटेचा यांनी कौतुक केले. अल्पवयातच तिने नेपाळमधील हिमलुंग हिमाल (७,१२६ मीटर) सर करून पहिली भारतीय महिला तसेच सर्वात तरुण भारतीय होण्याचा मान मिळवला आहे, असे आमदार मिहिर कोटेचा यांनी सांगितले.
सानिकाची गिर्यारोहणातील कामगिरी
सानिकाने विविध खंडांतील अनेक आव्हानात्मक शिखरे सर केली आहेत. आफ्रिकेतील सर्वोच्च शिखर किलिमांजारो (५,८९५ मीटर) आणि युरोपमधील सर्वोच्च शिखर एल्ब्रुस (५,६४२ मीटर) ही शिखरे सर करून तिने उत्तुंग यश मिळविले आहे.
भारतामध्ये तिने लडाखमधील कांग यात्से II (६,२५० मीटर), फ्रेंडशिप पीक (५,२८९ मीटर) आणि पंगारचुल्ला पीक (४,५९० मीटर) ही आव्हानात्मक शिखरे सर केली आहेत. तसेच अन्नपूर्णा बेस कॅम्प आणि फुलारा रिज हे कठीण ट्रेक्सही तिने यशस्वीरीत्या पूर्ण केले आहेत.