मुंबई : बॉलिवूडमध्ये गाजलेला आणि प्रेक्षकांची मनं जिंकणारा २०२५ मधील छत्रपती संभाजी महाराजांच्या जीवनगाथेवर आधारित असणारा छावा सिनेमा बॉक्स ऑफिसवर सुपरहिट ठरला. लक्ष्मण उतेकर दिग्दर्शित आणि विक्की कौशल स्टारर 'छावा' सिनेमा आपल्या धमाकेदार यशानंतर पुन्हा एकदा ही जोडी इतिहास घडवण्यासाठी एकत्र येणार असल्याची चर्चा होत आहे.
छावा सिनेमानं प्रदर्शनानंतर बॉक्स ऑफिसवर तब्बल ८०७ कोटींची दमदार कमाई केली. या विक्रमी यशानंतर आता छावा सिनेमाचे निर्माते लवकरच छावा २ प्रेक्षकांच्या भेटीला घेऊन येण्यासाठी सज्ज झाले आहेत. मराठा साम्राज्यातील आणखी एका महान व्यक्तिमत्त्वाची कथा या पुढील भागात दाखवली जाणार असल्याच्या चर्चा जोरदार रंगल्या आहेत.
मिळालेल्या माहितीनुसार लक्ष्मण उतेकर (Laxman Utekar) आणि विक्की कौशल (Vicky Kaushal) 'छावा' (Chhaava Movie)चा सिक्वेल बनवण्याच्या तयारीत असून 'छावा'मध्ये संभाजी महाराजांच्या शौर्याची कथा दाखवण्यात आली होती, तर या सिनेमाच्या सीक्वेलमध्ये त्यांचे सुपुत्र 'शाहू महाराज' यांच्या जीवनावर आणि त्यांच्या संघर्षांवर आधारित कथा मांडली जाणार असल्याची माहिती आहे.
विक्की कौशलनं या कथेबद्दल विशेष रस दाखवला असून तो पुन्हा एकदा दिग्दर्शक लक्ष्मण उतेकर यांच्या दिग्दर्शनाखाली काम करण्यास उत्सुक आहे. सध्या हा प्रोजेक्ट सुरुवातीच्या टप्प्यात असून सर्व काही सुरळीत झालं, तर पुढच्या वर्षी किंवा २०२८ च्या सुरुवातीला या सिनेमाचं शुटिंग सुरू होण्याची शक्यता आहे.
या नव्या सिनेमाची चर्चा सुरु असली तरी विक्की आणि लक्ष्मण उतेकर सध्या त्यांच्या इतर प्रोजेक्ट्समध्ये व्यस्त असून लक्ष्मण उतेकर सध्या 'ईथा' या सिनेमाच्या दिग्दर्शनात गुंतले असून त्यात श्रद्धा कपूर मुख्य भूमिकेत आहे. हा सिनेमा पूर्ण केल्यानंतरच ते शाहू महाराजांच्या कथेची तयारी सुरु करणार आहेत.
तर विक्की कौशलही खूप व्यस्त असून सध्या विक्की संजय लीला भन्साळींच्या 'लव्ह अँड वॉर' या सिनेमाचं शूटिंग करत असून त्यानंतर भगवान परशुरामांवर आधारित 'महावतार' या मोठ्या प्रोजेक्टसाठी तयारी करणार आहेत. पण, या नव्या सिनेमाबाबत विक्की कौशल किंवा लक्ष्मण उतेकर यांच्याकडून अद्याप कोणतीही अधिकृत घोषणा करण्यात आलेली नाही. मात्र, छावा सिनेमाच्या ऐतिहासिक अनुभवानंतर आता छावा २ पाहण्यासाठी प्रेक्षकांची उत्सुकता प्रचंड वाढली आहे.