मुंबई : अभिनेता रितेश देशमुखचा ( Riteish Deshmukh ) बहुप्रतिक्षित छत्रपती शिवाजी महाराज यांच्या जीवनावर आधारित सिनेमा राजा शिवाजी लवकरच प्रेक्षकांच्या भेटीला येणार आहे. रितेश देशमुख दिग्दर्शित 'राजा शिवाजी' हा सिनेमा येत्या १ मे २०२६ रोजी महाराष्ट्र दिनी प्रदर्शित होणार असून नुकताच या सिनेमाचा टिझर रिलीज झाला आहे. सिनेमाचा हा टीझर पाहून अनेकांच्या अंगावर शहारा अल्याशिवाय राहणार नाही.
या सिनेमात अनेक दिग्गज कलाकार झळकणार असून मराठा साम्राज्याचे संस्थापक म्हणून छत्रपती शिवाजी महाराज यांच्या कार्याचा आढावा या सिनेमात घेण्यात आला आहे. सिनेमाची निर्मिती जेनेलिया देशमुख आणि ज्योती देशपांडे यांनी केली आहे.
'राजा शिवाजी' (Raja Shivaji) सिनेमात छत्रपती शिवाजी महाराजांचं शौर्य, त्याग आणि दूरदृष्टीचा गौरव करणारा सिनेमॅटिक अनुभव देणार असल्याचा दावा निर्मात्यांनी केला आहे. अन्यायाविरुद्ध उभ्या राहिलेल्या स्वराज्याच्या लढ्याची गाथा या सिनेमातून प्रभावीपणे मांडली जाणार आहे. या सिनेमाच्या संगीताची जबाबदारी प्रसिद्ध संगीतकार जोडी अजय-अतुल यांच्याकडे असून नामांकित छायाचित्रकार संतोष शिवन या सिनेमाच्या माध्यमातून मराठी सिनेसृष्टीत पदार्पण करत आहेत.
या सिनेमात संजय दत्त, अभिषेक बच्चन, महेश मांजरेकर, सचिन खेडेकर, भाग्यश्री, फरदीन खान, जितेंद्र जोशी, अमोल गुप्ते, विद्या बालन हे दिग्गज कलाकार भूमिका साकारणार असून अभिनेता रितेश देशमुख छत्रपती शिवाजी महाराजांची भूमिका साकारणार आहे. याचा पहिला लूक पाहून प्रेक्षक थक्क झाले आहेत. टीझरमध्ये रितेशला महाराजांच्या भूमिकेत पाहिल्यावर प्रेक्षकांची उत्सुकता वाढली आहे. तर, त्याची पत्नी जेनेलिया देशमुख या सिनेमात सईबाईंच्या भूमिकेत झळकणार आहे.
या टीझरला प्रेक्षकांचा संमिश्र प्रतिसाद मिळत असून यामध्ये झळकणाऱ्या दिग्गज कलाकारांच्या दमदार अभिनयाचं प्रेक्षकांकडून कौतुक केलं जात आहे. 'राजा शिवाजी' सिनेमाच्या टीझरला अवघ्या पंधरा तासांत ६ लाख ३७ हजार ८४७ व्ह्यूज मिळाले आहेत.
जिओ स्टुडिओज प्रस्तुत आणि मुंबई फिल्म कंपनी निर्मित हा सिनेमा मराठी आणि हिंदी अशा दोन्ही भाषांमध्ये रिलीज होणार आहे. अभिनेता-दिग्दर्शक रितेश देशमुख या सिनेमात छत्रपती शिवाजी महाराजांची भूमिका साकारत असून पोस्टरमधील रितेशचा लूक पाहून हा सिनेमा पाहण्यासाठी चाहत्यांचा उत्साह प्रचंड वाढला आहे.