डोंबिवली : ठाणे जिल्ह्यातील डोंबिवलीच्या दावडी परिसरात राहणाऱ्या रीलस्टार सुरेंद्र पाटीलच्या घरातून कल्याण क्राइम ब्रँचने मोठा शस्त्रसाठा जप्त केला. खबरींनी दिलेल्या माहितीआधारे पोलिसांनी सुरेंद्र पाटीलच्या घरावर धाड टाकली आणि शस्त्रसाठा जप्त केला.
पोलिसांनी सुरेंद्र पाटीलच्या घरातून तीन देशी बनावटीच्या पिस्टल, एक सिक्सर रिव्हॅालवर, सात गावठी कट्टे, दोन एअर गन, ४०५ जिवंत काडतुसे, १६७ छर्रे, दोन तलवारी, तीन लोखंडी कोयते, एक सुरा, दोन चाकू, लोखंडी रॉड आणि तीन लाख वीस हजारांची रोकड जप्त केली. जप्त केलेल्या मुद्देमालाप्रकरणी सुरेंद्र पाटीलची कसून चौकशी सुरू आहे.
सुरेंद्र पाटील विरोधात बारा पेक्षा जास्त गंभीर गुन्ह्यांची नोंद आहे. शस्त्र हाती घेऊन रील तयार करणारा सुरेंद्र परिसरात दहशत पसरवत होता. धक्कादायक म्हणजे डोंबिवली मानपाडा पोलिस स्टेशनमध्ये पोलिस अधिका-याच्या खुर्चीवर बसून रील तयार केल्याचा गंभीर आरोप सुरेंद्रवर आहे. तसेच एका मुलीच्या विनयभंगाचा गुन्हा देखील सुरेंद्रवर दाखल आहे. सध्या जामिनावर असलेला सुरेंद्र पोलिसांच्या प्रश्नांना समाधानकारक उत्तरं देण्यास अपयशी ठरला तर पुन्हा कोठडीत जाण्याची शक्यता आहे.
सुरेंद्रने घरात चप्पल-बूट ठेवण्याच्या स्टँडमध्ये एक मोठा गुप्त कप्पा केला होता. या कप्प्यात तो शस्त्रसाठा ठेवत असल्याची माहिती पोलिसांना मिळाली. माहितीआधारे तपासणी केल्यावर घरात मोठा शस्त्रसाठा आढळल्याचे पोलिसांनी सांगितले.
ताज्या घडामोडींमुळे सुरेंद्र आणि त्याच्या संपर्कात असलेल्या सर्व व्यक्ती या पोलिसांच्या संशयाच्या भोवऱ्यात आहेत. रीलस्टारच्या घरात सापडलेल्या शस्त्र साठ्याप्रकरणी तपास सुरू आहे.