मुंबई : कलाविश्वातील अनेक कलाकार सध्या विवाहबंधनात अडकले आहेत. अशातच आता आणखी एका अभिनेत्रीचा विवाह सोहळा लवकरच पार पडणार आहे.
झी मराठीवरील 'तुला पाहते रे' या मालिकेतून प्रेक्षकांच्या मनात घर करून गेलेली अभिनेत्री गायत्री दातार तिच्या नव्या आयुष्याची सुरुवात करणार असून लवकरच ती विवाहबंधनात अडकणार आहे. नुकताच गायत्रीनं आपल्या होणाऱ्या नवऱ्यासह काही फोटो सोशल मीडियावर शेअर केले होते. हे फोटो शेअर करत तिनं आपल्या प्रेमाची कबूली दिली होती. गायत्रीच्या होणार्या नवऱ्याचं नाव श्रीकांत चवरे असं आहे.
नुकताच नाटकाच्या टीमनं गायत्रीचं केळवणं केलं असून याचा खास व्हिडिओही तिने सोशल मीडियावर शेअर केला. हा व्हिडिओ शेअर करत गायत्रीनं कॅप्शनमध्ये लिहिलं की, 'बेस्ट केळवण.. काही बेस्ट माणसांकडून.. आपल्या आयुष्यात अशी कमी माणसं आहेत, कमी वेळात येतात आणि आपलंसं करुन टाकतात'.
सिरिअल किलर नाटकाचे दिग्दर्शक, निर्माते, भाऊ कदम, तेजस, गौरी तसेच संर्पूण टीम खूप खास आहे. प्रणय तेली सर आणि तुमच्या कुटुंबाचंही आभार. केदार देसाई यांच्या कुटुंबाचंही आभार. माझ्या केळवणसाठी इतकी सुंदर तयारी केली, त्याबद्दल आभार, असं तिनं म्हटलं आहे.
या केळवणात मोदक, पुरणपोळी, फिश फ्राय, घावण, माशाचं सार आणि भात असे गायात्रीच्या आवडीचे खास पदार्थ बनवण्यात आले. गायत्रीनं शेअर केलेल्या या सुंदर व्हिडीओवर चाहत्यांकडून शुभेच्छांचा वर्षाव झाला.