नाशिक: महाराष्ट्रातील भोंदूबाबा म्हणजेच अशोक खरातचं काळं सत्य आता हळूहळू समोर येत आहे. स्वत:ला कॅप्टन आणि महादेवाचा अवतार मानणारा अशोक खरात याने आस्था आणि चमत्काराच्या नावाखाली महिलांचं शोषण, काळी जादू आणि कोट्यवधींची अवैध संपत्ती उभी केल्याच्या आरोपांनी राज्यभरात खळबळ उडाली आहे. आता राज्य सरकारने एसआयटीचं गठण केलं असून त्याची जबाबदारी आयपीएस अधिकारी तेजस्वी सातपुते यांच्यावर सोपवण्यात आली आहे. त्यांच्या नेतृत्वात या हाय-प्रोफाइल केसमध्ये मोठे खुलासे होऊ शकतात अशी शक्यता व्यक्त केली जात आहे.
कोण आहेत आयपीएस तेजस्वी सातपुते?
आयपीएस तेजस्वी सातपुते महाराष्ट्र कॅडरच्या २०१२ च्या बॅचमधील हुशार आयपीएस अधिकारी आहे. त्यांच्याकडे दहा वर्षांपेक्षा जास्त काळाचा अनुभव आहे. तेजस्वी सातपुते यांना लहानपणी पायलट व्हायचं होतं. मात्र काही कारणामुळे त्यांना पायलट होता आलं नाही. एलएलबीचं शिक्षण घेत असताना त्यांनी स्पर्धा परीक्षेची तयारी सुरू केली. युपीएससीच्या पहिल्या परीक्षेत त्यांना यश मिळू शकलं नाही. २०११ मध्ये दुसऱ्या प्रयत्नात त्या उत्तीर्ण झाल्या. त्यांनी इतिहास आणि मराठी भाषा पर्यायी विषय म्हणून निवडला होता.
होम केडर महाराष्ट्रात आयपीएस झाल्यानंतर तेजस्वी सातपुते यांनी पुण्यात डीसीपी असताना हेल्मेट अभियान यशस्वी करून दाखवलं आणि २० टक्क्यांवरुन ८० टक्क्यांपर्यंत प्रवाशांना हेल्मेट घालण्यास प्रेरित केलं. सोलापुरात असताना त्यांनी ऑपरेशन परिवर्तन चालवित अवैध दारुविरोधात कडक कारवाई केली. महाराष्ट्र पोलिसांत आयपीएस तेजस्वी सातपुतेची ओळख एक कडक, प्रामाणिक आणि निकाल देणाऱ्या अधिकाऱ्याच्या रुपात आहे. याच कारणास्तव सरकारने या संवेदनशील प्रकरणाची जबाबदारी त्यांच्यावर सोपवली. महाराष्ट्र पोलिसात आयपीएस तेजस्वी सातपुते पश्चिम महाराष्ट्राच्या अहमदनगर जिल्ह्यातील शेवगाव शहरातील राहणाऱ्या आहेत. त्यांच्या आई शिक्षिका आणि वडील शेतकरी आहेत.
‘भोंदूबाबा' अशोक खरात कोण आहे?
६७ वर्षीय अशोक खरात नाशिकचा राहणारा आहे. साधारण २० वर्षांपूर्वी मर्चंट नेव्हीतून तो सेवानिवृत्त झाला. यानंतर ज्योतिषी म्हणून त्याने आपलं करिअर सुरू केलं. असं म्हटलं जातं की, त्याला १५ भाषांचं ज्ञान आहे. तो स्वत:ला अंकशास्त्रज्ञ असल्याचं सांगतो. हस्तरेखा पाहून तो लोकांना भविष्य सांगतो आणि तंत्र-मंत्राच्या साहाय्याने त्यांना गंडवतो. त्याच्यावर काळी जादू आणि अघोरी प्रथांचा वापर केल्याचा आरोप आहे. त्यांच्या दरबारात बडे नेतेमंडळी, अधिकारी आणि सर्वसामान्य लोकही येत होते.
अशोक खरातकडून महिलांचं लैंगिक शोषण..
अशोक खरात याच्याविरोधात अत्यंत गंभीर आरोप आहेत. ज्यामध्ये महिलांचं लैंगिक शोषण, काळी जादू, जादूटोणा, जबरदस्तीने वसुली आणि अवैध संपत्ती याशिवाय राजकीय आणि प्रशासकीय संपर्कांचा उपयोग केल्याचा आरोप आहे. तपासादरम्यान पोलिसांना ५० हून अधिक आक्षेपार्ह व्हिडिओ सापडले आहेत. याशिवाय अनेक मोठ्या नेत्यांसह खरातचे फोटो समोर आले आहे. महाराष्ट्र राज्य महिला आयोगाच्या अध्यक्षा रुपाली चाकणकर यांचे खरातसोबत कथित संबंधावर चर्चा आहे.
आता एसआयटी या संपूर्ण प्रकरणाचा उलगडा करण्यासाठी प्रयत्न करत आहे. आयपीएस तेजस्वी सातपुते या एसआयटीचं नेतृत्व करत आहेत. आयपीएस तेजस्वी सातपुते यांच्या नेतृत्वाखाली तपास जसजसा पुढे जात आहे, तसतशी 'श्रद्धेच्या नावाखाली उभारलेल्या या साम्राज्या'मागील अनेक प्रमुख नावे उघडकीस येण्याची शक्यता आहे. आता संपूर्ण महाराष्ट्र राज्याचे लक्ष या प्रकरणावर केंद्रित झालं आहे. जिथे एकीकडे अंधश्रद्धा आणि ढोंगीपणाचे जाळ आहे, तर दुसरीकडे कडक पोलीस कारवाई सुरू आहे.