आयपीएल २०२६ च्या आधी कोलकाता नाईट रायडर्सच्या अडचणी कमी होण्याची कोणतीही चिन्हे दिसत नाहीत. हर्षित राणानंतर, वेगवान गोलंदाज आकाश दीप देखील आयपीएल २०२६ मध्ये खेळू शकणार नाही. याचा केकेआरच्या वेगवान गोलंदाजीवर गंभीर परिणाम झाला आहे. श्रीलंकेचा वेगवान गोलंदाज मथिशा पाथिरानाचा सहभागही अजून अनिश्चित आहे. हे स्पष्ट आहे की, तो सुरुवातीच्या सामन्यांमध्ये खेळणार नाही. परिणामी, अजिंक्य रहाणेच्या नेतृत्वाखालील संघाला आगामी हंगामापूर्वी वेगवान गोलंदाजासाठी बदली क्रिकेटपटू शोधावा लागणार आहे.
आकाश दिप आयपीएलमधून बाहेर आहे आणि संपूर्ण हंगाम खेळू शकणार नाही. असे समजले आहे की, आकाश दीपच्या पाठीच्या खालच्या भागात स्ट्रेस रिॲक्शनचा त्रास होत आहे. रणजी ट्रॉफीदरम्यान त्याला ही दुखापत झाली होती. त्याला बरे होण्यासाठी किमान तीन महिने लागण्याची शक्यता आहे. या २९ वर्षीय वेगवान गोलंदाजाला केकेआरने आयपीएल २०२६ च्या लिलावात १ कोटी रुपयांच्या मूळ किमतीत विकत घेतले होते. त्याने यापूर्वी आयपीएलमध्ये लखनऊ सुपर जायंट्स आणि रॉयल चॅलेंजर्स बंगळूर संघांकडून खेळला आहे.
देशांतर्गत क्रिकेटमध्ये बंगालकडून खेळणारा आकाश दीप दुखापतींमुळे त्रस्त आहे. त्याने आतापर्यंत आयपीएलमध्ये १४ सामने खेळले असून, ११.८२ च्या इकॉनॉमी रेटने १० बळी घेतले आहेत. तो गेल्या हंगामात लखनऊ संघाचा भाग होता. त्याने सहा सामने खेळून तीन विकेट्स घेतल्या होत्या. तो अद्याप कोणत्याही हंगामातील सर्व सामने खेळलेला नाही. आकाश २०२२ मध्ये आयपीएलमध्ये सामील झाला.
जुलै २०२५ मध्ये इंग्लंड दौऱ्यावरील कसोटी मालिकेदरम्यान आकाश दीप जखमी झाला होता. तो मँचेस्टरमधील चौथी कसोटी खेळू शकला नाही. यापूर्वी ऑस्ट्रेलिया दौऱ्यावरील कसोटी मालिकेदरम्यान त्याला दुखापत झाली होती, ज्यामुळे तो तीन महिने मैदानाबाहेर होता. पण तो आयपीएल २०२५ साठी तंदुरुस्त होऊन परतला.
गेल्या काही वर्षांपासून आकाश भारतीय कसोटी संघात एक महत्त्वाचा खेळाडू म्हणून उदयास आला आहे. तो जसप्रीत बुमराह आणि मोहम्मद सिराज यांच्यासोबत तिसऱ्या वेगवान गोलंदाजाची भूमिका बजावतो. त्याने आतापर्यंत १० कसोटी सामने खेळले असून त्यात २८ बळी घेतले आहेत.