न्यूयॉर्क : मोबाईल, ईव्ही, ई-बाईक यांना आग लागल्याच्या बातम्या अधूनमधून येत असतात. पण ताजी घटना टूथब्रशच्या स्फोटाची आहे. एका महिलेने ही माहिती न्यूयॉर्क टाइम्सला दिली आहे. बाथरूममध्ये इलेक्ट्रिक टूथब्रश होता. या टूथब्रशचा स्फोट झाला. सुदैवाने त्यावेळी बाथरूममध्ये कोणीही नव्हते त्यामुळे कोणीही जखमी झालेले नाही. पण बाथरूममध्ये असलेला आरसा तसेच इतर काच सामना फुटून सर्वत्र काचांचा खच झाला.
शार्लोट बोवर्स नावाची ३३ वर्षांची महिला मागील आठ महिन्यांपासून इलेक्ट्रिक टूथब्रश वापरत होती. ती कधीच रात्री झोपताना ब्रश चार्ज करण्यासाठी ठेवत नव्हती. जेव्हा घटना घडली त्यावेळी परिसरातील वीज प्रवाह खंडीत झालेला होता. वीज प्रवाह पुन्हा सुरू झाला आणि थोड्याच वेळात बाथरूममधून स्फोटासारखा आवाज आला. बाथरूममधील बेसिनवर ठेवलेला इलेक्ट्रिक टूथब्रश जळून खाक झाला होता. स्फोटामुळे बाथरूममध्ये काचांचा खच पडला होता.
स्फोटामुळे बाथरूमचे प्रचंड नुकसान झाले. शार्लोट आणि तिचे पती बेडरूममध्ये होते. स्फोटात त्यांना काहीही झाले नाही. पण स्फोटानंतर त्यांना बाथरूम दुरुस्त करण्यासाठी प्रचंड खर्च करावा लागला. या प्रकरणी टूथब्रश कंपनीला शार्लोट बोवर्सने माहिती दिली. माहिती मिळताच कंपनीने जास्त चौकशी न करता शार्लोटला ४६ डॉलरची भरपाई देण्याची तयारी दाखवली आहे. पण बाथरूमच्या दुरुस्ती झालेला खर्च विचारात घेता कंपनीने भरपाईची रक्कम वाढवावी, अशी मागणी शार्लोट बोवर्स करत आहे.