दुबई : पश्चिम आशियात २८ फेब्रुवारी २०२६ पासून अमेरिका - इस्रायल विरुद्ध इराण असे युद्ध सुरू आहे. या युद्धाने आता १७ व्या दिवसांत प्रवेश केला आहे. इराणने सोमवारी १६ मार्च २०२६ रोजी सकाळीच दुबई आंतरराष्ट्रीय विमानतळावर हवाई हल्ला केला. या हल्ल्यामुळे विमानतळावर एका इंधन टाकीला आग लागली. यानंतर खबरदारीचा उपाय म्हणून दुबई आंतरराष्ट्रीय विमानतळावरील सर्व नियोजीत उड्डाणं पुढील सूचनेपर्यंत स्थगित केली आहेत अथवा अन्यत्र वळवली आहेत. विमानतळावर दहशतीचे वातावरण आहे. परिस्थिती थोड्याच वेळात नियंत्रणात आली असल्याचे अधिकाऱ्यांनी सांगितले. पण प्रवाशांना त्यांच्या विमानाचे नियोजन जाणून घेण्यासाठी थेट आपापल्या विमान कंपनीच्या संपर्कात राहण्याच्या सूचना देण्यात आल्या आहेत.
हवाई हल्ल्यात जीवितहानी झालेली नाही पण दुबई आंतरराष्ट्रीय विमानतळावरील एका इंधन टाकीला आग लागली आहे. ही आग नियंत्रणात आणण्याचे प्रयत्न अग्निशमन दल करत आहे. अग्निशमन दलाकडून जोपर्यंत परवानगी मिळत नाही तोपर्यंत विमान वाहतूक बंदच राहील, असे दुबई आंतरराष्ट्रीय विमानतळाच्या प्रशासनाने सांगितले.
युद्धाला दोन आठवड्यांपेक्षा जास्त कालावधी झाला आहे. पण अमेरिकेच्या अपेक्षेप्रमाणे इराण शरण आलेला नाही. अमेरिकेचे अध्यक्ष ट्रम्प ट्रुथ या सोशल मीडिया प्लॅटफॉर्मवरून सातत्याने इराणला मोठे दणके दिल्याचे सांगत आहेत. तर इराण अधूनमधून आखाती देशांतील पंचतारांकीत हॉटेल, बहुराष्ट्रीय बँकांची कार्यालये, आंतरराष्ट्रीय विमानतळ, अमेरिकेचे आखाती देशांतील तळ, अमेरिकेचे रडार स्टेशन आदी ठिकाणी हल्ले केल्याचे सांगत आहे. इराणची लढण्याची बरीचशी ताकद नष्ट केल्याचे ट्रम्प सांगत आहेत. पण अमेरिकेची अवघ्या १६ दिवसांत दोन लढाऊ विमानं आणि सहा हवेत इंधन भरणारी केसी १३५ स्ट्रॅटोटँकर अशी एकूण आठ विमानं पाडल्याचे इराण सांगत आहे. इराण विरुद्ध आपलीच सरशी होत असल्याचे सांगणाऱ्या अमेरिकेने हळू हळू युद्धात मारल्या गेलेल्या स्वतःच्या सैनिकांची नावं जाहीर करण्यास सुरुवात केली आहे.
युद्ध सुरू झाल्यापासून आतापर्यंत यूएईला लक्ष्य करून इराणने १८०० पेक्षा जास्त हवाई हल्ले केले आहेत. यात क्षेपणास्त्र आणि ड्रोनद्वारे केलेल्या अनेक हल्ल्यांचा समावेश आहे. इराणच्या हल्ल्यांमुळे यूएईमध्ये जीवितहानी आणि वित्तहानी झाली आहे.