पाकिस्तानचा फलंदाज सलमान आघा Salman Agha पुन्हा एकदा चर्चेत आला आहे. बांगलादेशविरुद्धच्या सामन्यात धावबाद झाल्यानंतर मैदानात संताप व्यक्त केल्यामुळे International Cricket Council (आयसीसी) ने त्याला फटकारले असून त्याच्या खात्यात एक डिमेरिट पॉइंट जोडण्यात आला आहे.
पाकिस्तान नॅशनल क्रिकेट टीम आणि बांग्लादेश नॅशनल क्रिकेट टीम यांच्यातील दुसऱ्या एकदिवसीय सामन्यात ही घटना घडली. अर्धशतक झळकावल्यानंतर सलमान आघा खेळत असताना डावाच्या ३९ व्या षटकात बांगलादेशचा कर्णधार मेहेदी हसन मिराझ गोलंदाजीसाठी आला. त्या षटकात मोहम्मद रिझवान Mohammad Rizwan ने पुढे येत फटका मारला असता चेंडू नॉन-स्ट्राइक एंडवर उभ्या असलेल्या आघाच्या पायाला लागला.
चेंडू थांबवण्याच्या प्रयत्नात मिराजची आघाशी धडक झाली. मात्र त्यानंतर मिराजने चेंडू पटकन उचलून स्टंप्सकडे फेकला आणि आघाला धावबाद केले. तिसऱ्या पंचाने बाद ठरवल्यानंतर सलमान आघा संतापला आणि त्याने आपले हेल्मेट व ग्लोव्हज मैदानावर फेकून नाराजी व्यक्त केली.
ही कृती आयसीसीच्या आचारसंहितेच्या लेव्हल-१ उल्लंघनात मोडत असल्याचे मानण्यात आले. त्यामुळे आघाच्या खात्यात एक डिमेरिट पॉइंट नोंदवण्यात आला आहे. मागील २४ महिन्यांतील हा त्याचा पहिलाच गुन्हा असल्याचे आयसीसीने स्पष्ट केले असून आघानेही ही शिक्षा स्वीकारली आहे.
