मुंबई : लोकप्रिय कॉमेडी शो महाराष्ट्राची हास्यजत्रा मधून प्रेक्षकांना खळखळून हसवणारी अभिनेत्री इशा डे हिने आयुष्यातील नवा अध्याय सुरू केला आहे. ईशाने प्रसिद्ध गीतकार व लेखक अभिषेक खणकार यांच्याशी पारंपरिक पद्धतीने विवाह केला. या लग्नसोहळ्याला मराठी मनोरंजन क्षेत्रातील अनेक कलाकारांनी उपस्थिती लावली.
सोशल मीडियावर लग्नाची जोरदार चर्चा
गेल्या काही दिवसांपासून ईशाच्या लग्नाबाबत सोशल मीडियावर उत्सुकता निर्माण झाली होती. अखेर १३ मार्च रोजी पार पडलेल्या या सोहळ्यात दोघांनी कुटुंबीय आणि जवळच्या मित्रांच्या उपस्थितीत लग्नगाठ बांधली. लग्नातील फोटो आणि व्हिडिओ सध्या सोशल मीडियावर मोठ्या प्रमाणात शेअर होत आहेत.
पारंपरिक महाराष्ट्रीयन लूकची चर्चा
लग्नासाठी ईशाने लाल रंगाची पारंपरिक नऊवारी साडी, नथ आणि पारंपरिक दागिने परिधान केले होते. तिचा हा पारंपरिक लूक चाहत्यांच्या विशेष पसंतीस उतरला. दुसरीकडे अभिषेकने कुर्ता-धोतर परिधान करून साधा पण देखणा महाराष्ट्रीयन वराचा लूक साकारला.
कोण आहे अभिषेक खणकर?
ईशाचा पती अभिषेक खणकर हा मराठी मनोरंजन विश्वातील परिचित गीतकार आणि लेखक आहे. अनेक लोकप्रिय मराठी मालिकांची शीर्षकगीते त्यांनी लिहिली आहेत. तसेच काही मराठी चित्रपटांसाठीही त्यांनी गाणी लिहून आपली वेगळी ओळख निर्माण केली आहे.
चाहत्यांकडून शुभेच्छांचा वर्षाव
लग्नाचे फोटो समोर आल्यानंतर चाहत्यांसह मराठी कलाविश्वातील कलाकारांनीही या नवविवाहित जोडप्यावर शुभेच्छांचा वर्षाव केला आहे. दरम्यान, ईशाने लग्नापूर्वी मेहंदी आणि केळवण समारंभाचे फोटो शेअर करून चाहत्यांना सुखद धक्का दिला होता. आता विवाहानंतर दोघांना नव्या प्रवासासाठी शुभेच्छा दिल्या जात आहेत.