वॉशिंग्टन डीसी : इराण विरूद्धच्या युद्धात अमेरिकेने दोन आठवड्यात चार विमानं गमावली आहेत. यूएस आर्मीचे हवेतल्या हवेत इंधन भरण्याचे केसी १३५ स्ट्रॅटोटँकर हे विमान इराकमध्ये गुरुवारी कोसळले. यूएस सेंट्रल कमांडने विमान कोसळल्याचे सांगितले. हे विमान इराकच्या पश्चिमेकडील भागात कोसळले. अमेरिकेने विमान कोसळण्याचे कारण जाहीर केलेले नाही. पण इराकमधील इराण समर्थक असलेल्या एका सशस्त्र गटाने विमान पाडल्याचा दावा केला आहे.
काय आहे केसी १३५ स्ट्रॅटोटँकर ?
केसी १३५ स्ट्रॅटोटँकर हे १९५० - ६० च्या दशकाच्या सुरुवातीला बोईंगने बनवले होते. ते अमेरिकन सैन्याच्या हवेतल्या हवेत इंधन भरण्याच्या ताफ्यासाठी एक आधारस्तंभ राहिले आहे आणि विमानांना उतरण्याची आवश्यकता न पडता मोहिमा पार पाडण्यास मदत करण्यासाठी ते अत्यंत महत्त्वाचे आहे. उपलब्ध आकडेवारीनुसार अमेरिकेच्या हवाई दलाकडे ३७६ केसी-१३५ विमाने होती, ज्यात १५१ सक्रिय, १६३ एअर नॅशनल गार्डमध्ये आणि ६२ एअर फोर्स रिझर्व्हमध्ये होती. अमेरिकेच्या नौदलाच्या वेबसाईटनुसार एका केसी १३५ स्ट्रॅटोटँकरची किंमत १९९८ मध्ये ३९.६ दशलक्ष डॉलर होती. सध्याच्या महागाईच्या निर्देशांकाचा विचार करता हे विमान ७९.६ दशलक्ष डॉलर होते. एका केसी १३५ स्ट्रॅटोटँकरमधून ८३ हजार पौंड मालाचे वहन करणे शक्य आहे. हे विमान हवेतल्या हवेत इंधन भरण्यासाठी तसेच युद्धभूमीवर उडते रुग्णालय आणि उडती रुग्णवाहिका अशा दोन्ही स्वरुपात वापरण्याची सोय आहे.
पश्चिम इराकमध्ये विमान कोसळण्याआधी केसी १३५ स्ट्रॅटोटँकर हे २०१३ मध्ये किर्गिस्तानमधील मानस विमानतळावरून उड्डाण केल्यानंतर लगेचच कोसळले होते. ताज्या घटनेत इराकमधील इराण समर्थक असलेल्या एका सशस्त्र गटाने विमान पाडल्याचा दावा केला आहे.