फुकेत : हैद्राबादहून थायलंडकडे निघालेल्या एअर इंडियाच्या विमानाला लँडिंगदरम्यान गंभीर तांत्रिक बिघाड झाल्याची घटना समोर आली आहे. फुकेत इंटरनॅशनल एअरपोर्ट येथे उतरताना विमानाचे नोज व्हील निकामी झाले अन विमानात असलेल्या १३३ जणांचे जीव टांगणीला लागले.
लँडिंगवेळी अचानक बिघाड
मिळालेल्या माहितीनुसार, एअर इंडिया फ्लाईट IX938 ने बुधवारी सकाळी ६:४२ वाजता राजीव गांधी इंटरनॅशनल एअरपोर्ट येथून उड्डाण केले होते. नियोजित वेळेनुसार हे विमान सकाळी ११:४० वाजता फुकेत आंतरराष्ट्रीय विमानतळावर उतरले. मात्र, लँडिंगच्या वेळी विमानाचे नोज व्हील अचानक निकामी झाले ज्यामुळे वैमानिकांना विमान धावपट्टीवर नियंत्रित करणे कठीण झाले. नोज व्हील हा विमानाचा अत्यंत महत्त्वाचा भाग मानला जातो, कारण त्याच्या मदतीने रनवेवर विमानाचे दिशा नियंत्रण केले जाते.
प्रवाशांमध्ये भीतीचे वातावरण
विमान रनवेवर थांबून राहिल्यामुळे काही काळ प्रवाशांमध्ये भीतीचे वातावरण निर्माण झाले. अचानक धूर दिसल्याने अनेक प्रवासी घाबरले होते. मात्र विमानातील क्रू मेंबर्सने तत्काळ परिस्थिती नियंत्रणात घेत प्रवाशांना सुखरूप बाहेर काढले. एअर इंडिया एक्सप्रेसने दिलेल्या अधिकृत माहितीनुसार, सर्व प्रवाशांना सुरक्षितपणे विमानाबाहेर उतरवण्यात आले असून कोणतीही जीवितहानी झालेली नाही.
विमानतळावरील सेवा विस्कळीत
या घटनेनंतर खबरदारीचा उपाय म्हणून फुकेत विमानतळावरील काही काळ उड्डाणे तात्पुरती स्थगित करण्यात आली. विमान रनवेच्या मध्यभागी अडकल्याने इतर विमानांच्या हालचालींवरही परिणाम झाला. जोपर्यंत हे विमान धावपट्टीवरून हटवले जात नाही, तोपर्यंत विमानतळावरील सेवा पूर्णपणे सुरळीत होण्यास वेळ लागू शकतो. दरम्यान, काही विमानांचे मार्ग बदलण्यात आले असून अनेक प्रवाशांना विलंबाचा सामना करावा लागत आहे.