भाजपाच्या हाती मुंबईकरांचे आरोग्य; सहा विशेष समित्यांच्या अध्यक्ष आणि उपाध्यक्षपदाची निवड बिनविरोध

March 11, 2026 09:28 AM

मुंबई: मुंबई महापालिकेच्या सहा विशेष समिती अध्यक्षपदासाठी अखेर भाजप आणि शिवसेनेच्यावतीने उमेदवारांची नावे जाहीर झाली असून दोन्ही पक्षांच्या प्रत्येकी तिन्ही उमेदवारांनी आपले अर्ज महापालिका सचिवांना सादर केले. विशेष म्हणजे आरोग्य समिती , बाजार व उद्यान समिती आणि स्थापत्य (उपनगरे)समिती ही भाजपकडे असून उर्वरीत महिला बाल कल्याण समिती, विधी व महसूल समिती तसेच स्थापत्य (शहर) समिती शिवसेनेकडे गेली आहे. महायुतीच्या उमेदवारांनी आपले उमेदवारी अर्ज सादर केले असले तरी प्रतिस्पर्धी पक्षाकडून कुणीही उमेदवारी अर्ज न भरल्याने या सहाही समित्यांचे अध्यक्ष बिनविरोध होणार आहे. त्यामुळे आरोग्य समिती भाजपकडे गेल्यामुळे मुंबईचे आरोग्य हे आता भाजपच्या हाती आहे.

मुंबई महापालिकेच्या आरोग्य समिती , बाजार व उद्यान समिती, स्थापत्य (शहर) समिती, स्थापत्य (उपनगरे)समिती,महिला बाल कल्याण समिती, विधी व महसूल समिती या सहा विशेष समित्यांच्या अध्यक्षपदासाठी मंगळवारी अर्ज दाखल. यामध्ये आरोग्य समिती अध्यक्षपदासाठी चांदिवली विधानसभेतील भाजपचे नगरसेवक हरिष भांदीर्गे यांनी तर विधी व महसूल समिती अध्यक्षपदी दहिसरमधील शिवसेना नगरसेविका दीक्षा हर्षद कारकर यांनी उमेदवारी अर्ज दाखल केले आहेत. तर बाजार व उद्यान समिती अध्यक्षपदासाठी भाजपच्या हेतल गाला आणि महिला बाल कल्याण समिती अध्यक्षपदी मिनल तुर्डे यांनी उमेदवारी अर्ज दाखल केला आहे. तर स्थापत्य शहर समिती अध्यक्षपदी शिवसेनेच्या यामिनी जाधव आणि स्थापत्य उपनगरे समिती अध्यक्षपदी संगिता ज्ञानमूर्ती शमा यांनी आपले उमेदवारी अर्ज महापालिका सचिवांना सादर केला. तसेच या सर्व समित्यांच्या अध्यक्षपदांबरोबरच उपाध्यक्षपदासाठीही उमेदवारी अर्ज सादर करण्यात आले आहेत. जिथे भाजपचा अध्यक्ष तिथे शिवसेनेचा उपाध्यक्ष आणि शिवसेनेचा अध्यक्ष तिथे भाजपचा उपाध्यक्ष म्हणून अर्ज दाखल करण्यात आले आहेत.