रियाध : मध्यपूर्वेत सुरू असलेल्या संघर्षाच्या पार्श्वभूमीवर सौदी अरेबियात झालेल्या क्षेपणास्त्र हल्ल्याबाबत महत्त्वाची माहिती समोर आली आहे. अल-खर्ज परिसरातील एका निवासी इमारतीवर क्षेपणास्त्र पडल्याने नागरिकांमध्ये भीतीचे वातावरण निर्माण झाले. या घटनेत एका भारतीय नागरिकाचा मृत्यू झाल्याची चर्चा होती; मात्र भारतीय दूतावासाने ही माहिती चुकीची असल्याचे स्पष्ट केले आहे.
इस्रायल आणि अमेरिकेने इराणविरोधात कारवाई सुरू केल्यानंतर गेल्या काही दिवसांत संघर्ष अधिक तीव्र झाला आहे. या पार्श्वभूमीवर इराणकडून कतार, बहरीन, सौदी अरेबिया आणि संयुक्त अरब अमिरातीतील अमेरिकन लष्करी तळांवर हल्ले करण्यात आल्याची माहिती समोर आली आहे.
भारतीय नागरिकाच्या मृत्यूची बातमी चुकीची
अल-खर्ज येथे झालेल्या हल्ल्यानंतर सुरुवातीला काही स्थानिक सूत्रांनी एका भारतीय नागरिकाचा मृत्यू झाल्याचे म्हटले होते. मात्र भारतीय दूतावासाने अधिकृत निवेदन देत ही माहिती फेटाळून लावली. दूतावासाने दिलेल्या माहितीनुसार, या घटनेत कोणत्याही भारतीयाचा मृत्यू झालेला नाही, तर एक भारतीय नागरिक जखमी झाला असून त्याच्यावर उपचार सुरू आहेत.
नेमकी घटना कशी घडली?
गेल्या आठवड्यात इराणकडून केलेल्या हल्ल्यांच्या मालिकेत सौदी अरेबियातील अल-खर्ज परिसरालाही लक्ष्य करण्यात आले. हा भाग लष्करीदृष्ट्या संवेदनशील मानला जातो. प्राथमिक अहवालात एक भारतीय आणि एक बांगलादेशी नागरिक मृत झाल्याचे सांगण्यात आले होते. मात्र नंतर अधिकृत दुरुस्तीत स्पष्ट करण्यात आले की, दोन बांगलादेशी नागरिकांचा मृत्यू झाला असून एका भारतीयासह एकूण १२ जण जखमी झाले आहेत.
जखमी भारतीयावर उपचार सुरू
भारतीय दूतावासाने सोशल मीडियावरील निवेदनात सांगितले की, जखमी भारतीय नागरिकाला अल-खर्जमधील सरकारी रुग्णालयात दाखल करण्यात आले आहे. दूतावासातील समुदाय कल्याण विभागाचे प्रतिनिधी वाय साबीर यांनी रुग्णालयात भेट देऊन जखमीची प्रकृती जाणून घेतली. दूतावास स्थानिक प्रशासनाशी सतत संपर्कात असल्याचेही सांगण्यात आले.
भारतीय नागरिकांसाठी सूचना
सौदी अरेबियातील तणावपूर्ण परिस्थिती लक्षात घेऊन रियाध आणि जेद्दाह येथील भारतीय मिशनने नागरिकांसाठी काही मार्गदर्शक सूचना जारी केल्या आहेत. स्थानिक प्रशासनाने जारी केलेल्या सुरक्षा नियमांचे पालन करावे अनावश्यक प्रवास टाळावा आणि सतर्क राहावे. रियाध, जेद्दाह आणि दम्मम येथून भारतासाठी विमान सेवा सध्या सुरू आहे. आपत्कालीन परिस्थितीत दूतावासाच्या हेल्पलाईन क्रमांकांवर संपर्क साधावा
सौदी अरेबियाचा इराणला इशारा
दरम्यान, या हल्ल्यांनंतर आखाती प्रदेशातील तणाव अधिक वाढला आहे. सौदी अरेबियाने इराणच्या कारवायांवर तीव्र प्रतिक्रिया देत, अरब देशांवरील हल्ले थांबवले नाहीत तर त्याचे गंभीर परिणाम होतील, असा इशारा दिला आहे. सौदी परराष्ट्र मंत्रालयाने म्हटले आहे की, या कारवायांमुळे प्रादेशिक स्थैर्यावर परिणाम होत असून भविष्यातील संबंधांवरही त्याचा परिणाम होऊ शकतो.
