अहमदाबाद : आयसीसी मेन्स टी ट्वेंटी वर्ल्डकप २०२६ च्या फायनलमध्ये भारत आणि न्यूझीलंड असा सामना सुरू आहे. या सामन्यात टॉस जिंकून न्यूझीलंडने गोलंदाजीचा निर्णय घेतला. प्रथम फलंदाजी करणाऱ्या भारताने २० षटकांत ५ बाद २५५ धावा केल्या. ही टी ट्वेंटी वर्ल्डकपच्या फायनलमधील आतापर्यंतची सर्वात मोठी धावसंख्या आहे. भारताने आपल्या इनिंगमध्ये तब्बल १८ षटकार आणि १९ चौकार मारले. जेम्स नीशमने संजू, इशान आणि सूर्यकुमार या तिघांना बाद केले तर मॅट हेन्रीने हार्दिकला आणि रचिन रवींद्रने अभिषेकला बाद केले.
संजू सॅमसनचे शतक सलग तिसऱ्या सामन्यात हुकले. फायनलमध्ये न्यूझीलंड विरुद्ध आणि सेमी फायनलमध्ये इंग्लंड विरुद्ध तो ८९ धावा करुनच बाद झाला. टी ट्वेंटी वर्ल्डकपच्या फायनलमधील आतापर्यंतची सर्वात मोठी वैयक्तिक धावसंख्या आहे. फायनलमध्ये त्याने ३३ चेंडूंमध्ये अर्धशतक केले. अभिषेकला अखेर फायनलमध्ये सूर गवसला. त्याने १८ चेंडूत अर्धशतक केले आणि टी ट्वेंटी वर्ल्डकपच्या नॉकआऊटमध्ये सर्वात वेगाने अर्धशतक करण्याची किमया साधली. टी ट्वेंटी क्रिकेटमध्ये पहिल्या सहा षटकांचा समावेश पॉवरप्लेमध्ये होतो. या पॉवरप्लेमध्ये क्षेत्ररक्षणावर निर्बंध लागू असतात. यामुळे चौकार षटकारांची आतषबाजी करण्याची संधी मिळते. विशेष म्हणजे अभिषेकने पॉवरप्लेमध्ये ५१ धावा केल्या. याआधी २०२४ च्या टी ट्वेंटी वर्ल्डकपमध्ये रोहित शर्मानेही पॉवरप्लेमध्ये ५१ धावा केल्या होत्या.
- संजू सॅमसन - ४६ चेंडूत ८९ धावा, ८ षटकार आणि ५ चौकार
- अभिषेक शर्मा - २१ चेंडूत ५२ धावा, ३ षटकार आणि ६ चौकार
- इशान किशन - २५ चेंडूत ५४ धावा, ४ षटकार आणि ४ चौकार
- हार्दिक पांड्या - १३ चेंडूत १८ धावा, १ षटकार आणि १ चौकार
- सूर्यकुमार यादव - एक चेंडू आणि शून्य धावा
- तिलक वर्मा - ६ चेंडूत नाबाद ८ धावा
- शिवम दुबे - ८ चेंडूत नाबाद २६ धावा, २ षटकार आणि ३ चौकार