इराणचे राष्ट्राध्यक्ष मसूद पेझेशकियन यांनी इस्रायल आणि अमेरिकेसोबतच्या युद्धादरम्यान शेजारी देशांवर झालेल्या हल्ल्यांबाबत दिलगिरी व्यक्त केली आहे. मात्र, इराणवर प्रथम हल्ला झाला नाही तर पुढे कोणत्याही देशावर हल्ला केला जाणार नाही, असेही त्यांनी स्पष्ट केले.
इराणच्या सरकारी टीव्हीवर प्रसारित झालेल्या भाषणात पेझेशकियन म्हणाले की, “माझ्या वतीने आणि इराणच्या वतीने शेजारी देशांवर झालेल्या हल्ल्यांबद्दल मी माफी मागतो. अंतरिम नेतृत्व परिषदेत निर्णय घेण्यात आला की, पुढे शेजारी देशांवर हल्ले केले जाणार नाहीत आणि त्या देशांकडून इराणवर हल्ला झाला तरच प्रत्युत्तर दिले जाईल.”
इराण कधीही माघार घेणार नाही :
मात्र त्यांनी इराण कधीही माघार घेणार नाही, असे ठामपणे सांगितले. “इराणी जनतेने शरणागती पत्करावी अशी शत्रूंची इच्छा आहे, पण ती इच्छा त्यांना त्यांच्या कबरीतच घेऊन जावी लागेल,” असे त्यांनी सांगितले.
‘ऑपरेशन एपिक फ्युरी’ अंतर्गत युद्धाला सुरुवात :
दरम्यान, २८ फेब्रुवारी रोजी अमेरिका आणि इस्रायलने इराणवर समन्वित हवाई हल्ले केले होते. अणु चर्चेतील अडथळे आणि इराणने पुन्हा अणु कार्यक्रम सुरू केल्याच्या आरोपांनंतर ‘ऑपरेशन एपिक फ्युरी’ अंतर्गत हे हल्ले करण्यात आले. या हल्ल्यांमध्ये राजधानी तेहरानसह अनेक शहरांना लक्ष्य करण्यात आले होते.
या कारवाईत इराणचे सर्वोच्च नेते आयतुल्ला अली खामेनी, त्यांची पत्नी, मुलगी, जावई आणि नात यांचा मृत्यू झाल्याची माहिती समोर आली आहे.
युद्धाचे पडसाद :
यानंतर इराणने इस्रायल आणि अमेरिकेशी संबंधित ठिकाणांवर क्षेपणास्त्र आणि ड्रोन हल्ले केले. विशेषतः दुबई, अबूधाबी, कतार, कुवेत आणि बहरीन या आखाती देशांमध्ये मोठे नुकसान झाल्याचे व्हिडिओ समोर आले आहेत. दुबई आंतरराष्ट्रीय विमानतळाजवळ झालेल्या हल्ल्यात चार जण जखमी झाले होते.
तसेच दुबईतील पाम जुमेराह परिसर आणि बर्ज अल अरब लक्झरी हॉटेलजवळही हल्ले झाल्याची माहिती आहे. ड्रोनचे अवशेष पडल्यामुळे दुबईतील अमेरिकन वाणिज्य दूतावासात आग लागल्याची घटनाही घडली. बहरीनमध्ये सरकारी तेल शुद्धीकरण प्रकल्पावरही क्षेपणास्त्र हल्ला झाल्याचे वृत्त आहे.
कतारच्या संरक्षण मंत्रालयाने दिलेल्या माहितीनुसार, देशावर १४ बॅलिस्टिक क्षेपणास्त्रे आणि चार ड्रोन डागण्यात आले, त्यापैकी एक क्षेपणास्त्र अल-उदीद कतारी लष्करी तळावर आदळले.
सौदी अरेबियाचा इराणला इशारा :
दरम्यान, सौदी अरेबियाने इराणला इशारा दिला आहे. संरक्षणमंत्री प्रिन्स खालिद बिन सलमान यांनी इराणने चुकीचा अंदाज लावू नये, असे सांगत अनेक क्षेपणास्त्र हल्ले आणि ड्रोन हल्ले परतवून लावल्याचा दावा केला आहे.
जगातील सर्वात मोठा तेल निर्यातदार असलेल्या सौदी अरेबियाने या आठवड्यात पूर्वेकडील रास तनुरा तेल शुद्धीकरण प्रकल्पावर दोन ड्रोन हल्ल्यांची नोंद केल्याचेही सांगितले जात आहे.