पश्चिम आशियातील वाढत्या तणावाच्या पार्श्वभूमीवर इराण – इस्रायल संघर्ष अधिक तीव्र झाल्याचे पाहायला मिळत आहे. अमेरिका आणि इस्रायलने शनिवारी (२८ फेब्रुवारी) सकाळी इराणवर एकाच वेळी ३० ठिकाणी हल्ले करून युद्धाला सुरुवात केली आहे. या हल्ल्यात इराणचे सर्वोच्च नेते आयातुल्ला अली खामेनी यांचा मृत्यू झाल्याची माहिती समोर आली आहे.
या परिस्थितीचा परिणाम आता संपूर्ण जगावर होताना दिसत आहे. अशातच तिसऱ्या महायुद्धाच्या नांदीला सुरुवात झाली आहे का असा प्रश्न निर्माण झाला आहे. अतिरेकी संघटना हिजबुल्लाह यांनी इराण ला पाठिंबा देत इस्रायलवर रात्रभर क्षेपणास्त्र हल्ला केला. सोमवारी मध्यरात्रीपासून इस्रायलवर क्षेपणास्त्र आणि आत्मघाती ड्रोन्सचा पाऊस पाडला आहे. या मोठ्या घडामोडीमुळे जगावर तिसऱ्या महायुद्धाचे सावट गडद झाले आहे.
खामेनेईंच्या रक्ताचा बदला घेणार :
लेबनानमधील इराण समर्थक उग्रवादी संघटना 'हिजबुल्लाह'ने अधिकृत निवेदन जारी करत या हल्ल्याची जबाबदारी स्वीकारली आहे. "अयातुल्ला अली खामेनेई यांच्या पवित्र रक्ताचा बदला घेण्यासाठी आणि इस्रायलच्या अत्याचाराला उत्तर देण्यासाठी आम्ही शेकडो मिसाईल्स आणि ड्रोन्सनी इस्रायलला लक्ष्य केले आहे," असे हिजबुल्लाहने म्हटले आहे. विशेष म्हणजे, गेल्या एक वर्षात पहिल्यांदाच हिजबुल्लाहने अशा प्रकारे मोठ्या हल्ल्याची उघड जबाबदारी स्वीकारली आहे.