दक्षिण अमेरिकेतील बोलीविया देशातून शुक्रवारी (२७ फेब्रुवारी) एक अतिशय भीषण बातमी समोर आली. राजधानी ला पाझजवळील एल आल्टो शहरात बोलिव्हियन वायुसेनेचे हरक्युलिस C-१३० हे अजस्र विमान अपघातग्रस्त झाले. स्थानिक वेळेनुसार सायंकाळी ६ च्या सुमारास हा अपघात झाला, ज्यामुळे संपूर्ण परिसरात एकच खळबळ उडाली. या भीषण दुर्घटनेत आतापर्यंत १५ जणांचा मृत्यू झाल्याची पुष्टी झाली असून, ३० हून अधिक लोक गंभीर जखमी झाले आहेत. लँडिंग किंवा टेक-ऑफच्या प्रक्रियेदरम्यान विमानावरचे नियंत्रण सुटले आणि ते धावपट्टीवरून वेगाने बाहेर घसरले. विमानाचा वेग इतका जास्त होता की, त्याने विमानतळाची मजबूत सीमाभिंत (Boundary wall) क्षणात तोडली आणि ते थेट जवळच्या सार्वजनिक रस्त्यावर जाऊन कोसळले. या अनपेक्षित संकटामुळे रस्त्यावरील नागरिकांना सावरण्याची संधीही मिळाली नाही. रस्त्यावर कोसळल्यानंतर हे महाकाय विमान तेथून जाणाऱ्या अनेक कार आणि इतर वाहनांवर आदळले. ही धडक इतकी भीषण होती की अनेक वाहने विमानाखाली चिरडली गेली असून त्यांचा पूर्णपणे चक्काचूर झाला आहे.
रस्त्यावर नव्या कोऱ्या चलनी नोटांचा खच
या भीषण विमान अपघातानंतर एक अत्यंत धक्कादायक दृश्य समोर आले आहे. माध्यमांच्या अहवालानुसार, हे हरक्युलिस C-130 विमान देशाच्या विविध दुर्गम भागांत नव्या चलनी नोटा पोहोचवण्याचे काम करत होते. अपघाताच्या तीव्रतेमुळे विमानातील साठा रस्त्यावर विखुरला गेला. दुर्घटनेनंतर रस्त्यावर सर्वत्र चलनी नोटांचा खच पडलेला पाहायला मिळाला. घटनास्थळी उपस्थित असलेल्या प्रत्यक्षदर्शींनी या घटनेचे व्हिडिओ चित्रण केले असून, नोटा विखुरल्याचे हे व्हिडिओ सध्या सोशल मीडियावर वाऱ्यासारखे पसरत आहेत. स्थानिक मीडिया संस्था 'युनिटेल'ने बोलिव्हियाच्या संरक्षण मंत्रालयाचा हवाला देत या माहितीला दुजोरा दिला आहे. हे लष्करी विमान सांता क्रूझ शहरातून उडाले होते आणि चलनाचा पुरवठा करण्यासाठी ते एल आल्टोच्या दिशेने जात होते. दुर्दैवाने, धावपट्टीवरून घसरल्यानंतर हे विमान सरळ रस्त्यावर आले आणि हा मोठा अनर्थ घडला. या विमानाचा उद्देश देशाच्या अंतर्गत भागांत आर्थिक व्यवहार सुरळीत ठेवण्यासाठी रोख रक्कम पोहोचवणे हा होता. या भीषण दुर्घटनेनंतर खबरदारीचा उपाय म्हणून एल आल्टो आंतरराष्ट्रीय विमानतळ काही काळासाठी सर्व प्रकारच्या वाहतुकीसाठी बंद करण्यात आले होते. राष्ट्रीय विमान कंपनी 'बोलिव्हियाना डी एव्हिएशन'ने अधिकृत निवेदन जारी करून स्पष्ट केले की, अपघातग्रस्त विमान त्यांच्या कंपनीच्या ताफ्यातील नव्हते, तर ते वायुसेनेचे लष्करी विमान होते. सध्या संपूर्ण परिसरात कडेकोट सुरक्षा तैनात करण्यात आली असून विखुरलेल्या चलनाचा ताबा घेण्याचे काम प्रशासन करत आहे.