अमेरिकेचे राष्ट्राध्यक्ष डोनाल्ड ट्रम्प यांनी ऑपरेशन सिंदूर संदर्भात एक मोठे विधान केले आहे. "जर मी नसतो तर या सिंदूर ऑपरेशनमध्ये पाकिस्तानी पंतप्रधानांचा मृत्यू झाला असता." असं विधान ट्रम्प यांनी केलं आहे. त्यांच्या या विधानामुळे सर्वत्र खळबळ उडाली आहे.
नेमकं काय म्हणाले ट्रम्प ?
डोनाल्ड ट्रम्प यांनी सांगितले की त्यावेळी म्हणजेच ऑपरेशन सिंदूरच्या वेळी परिस्थिती वेगाने बिघडत होती आणि ती नियंत्रणाबाहेर जाऊ शकली असती. जर त्यांनी हस्तक्षेप केला नसता तर त्याचे परिणाम भयानक झाले असते असे ट्रम्प यांनी म्हटले आहे. त्यावेळी पाकिस्तानी पंतप्रधान शाहबाज शरीफ यांच्या सुरक्षेलाही धोका होता असेही त्यांनी सांगितले.
'लाखो जीव वाचले' :
ट्रम्प यांनी त्यांच्या निवेदनात असाही दावा केला की त्यांच्या राजनैतिक पुढाकारांमुळे मोठ्या प्रमाणात जीवितहानी टाळता आली. त्यांनी सांगितले की त्यांच्या वाटाघाटी आणि हस्तक्षेपामुळे अंदाजे ३५ दशलक्ष लोकांचे जीव वाचले. त्यांनी असाही दावा केला आहे की भारत आणि पाकिस्तान यांच्यातील ही परिस्थिती अणु संघर्षाकडे जात होती, परंतु ती वेळीच रोखण्यात आली.
राजनयिकतेने एक मोठे संकट टाळले :
ट्रम्प यांच्या मते, त्यांनी दोन्ही देशांमधील तणाव कमी करण्यासाठी संवादाचा मार्ग स्वीकारला आणि यामुळे परिस्थिती हळूहळू सामान्य होऊ लागली. डोनाल्ड ट्रम्प यांच्या या दाव्याला इतर देशांनी अधिकृतपणे दुजोरा दिलेला नसला तरी, ट्रम्प यांचे विधान आंतरराष्ट्रीय राजकारणात चर्चेचा विषय बनले आहे.