कोलंबो :टी-२० विश्वचषकाच्या 'सुपर-८' फेरीचा थरार आजपासून खऱ्या अर्थाने सुरू होत असून, ग्रुप-२ मध्ये न्यूझीलंड आणि पाकिस्तान या दोन बलाढ्य संघांमध्ये काट्याची टक्कर पाहायला मिळणार आहे. कोलंबोच्या आर. प्रेमदासा स्टेडियमवर होणाऱ्या या सामन्यात न्यूझीलंडच्या फलंदाजांसमोर पाकिस्तानच्या जागतिक दर्जाच्या फिरकी आक्रमणाला थोपवण्याचे सर्वात मोठे आव्हान असणार आहे.
कोलंबोची खेळपट्टी पारंपरिकपणे संथ आणि फिरकीला पोषक मानली जाते. पाकिस्तानकडे सध्या उस्मान तारिक सारखा 'मिस्ट्री स्पिनर' आहे, ज्याची गोलंदाजीची शैली फलंदाजांना कोड्यात टाकत आहे. त्याला साथ देण्यासाठी अनुभवी शादाब खान, अबरार अहमद आणि मोहम्मद नवाज यांची फौज सज्ज आहे.
पाकिस्तानच्या फिरकीला उत्तर देण्यासाठी न्यूझीलंडच्या फलंदाजांनी खास तयारी केली आहे. ग्लेन फिलिप्स आणि रचिन रवींद्र हे फिरकीपटूंच्या चेंडूंवर 'स्वीप' आणि 'रिव्हर्स स्वीप'चा सराव करत आहेत. तसेच, कोलंबोच्या मैदानातील मोठ्या बाउंड्रीचा फायदा घेण्यासाठी एकेरी-दुहेरी धावांवर भर देऊन धावगती कायम राखण्याचा त्यांचा प्रयत्न असेल.
पाकिस्तानचा माजी कर्णधार बाबर आझम सध्या खराब फॉर्ममध्ये असून त्याने ४ सामन्यात केवळ ६६ धावा केल्या आहेत. न्यूझीलंडच्या वेगवान माऱ्यासमोर त्याला स्वतःला सिद्ध करावे लागेल. पॉवरप्लेमध्ये फिन ॲलनने आक्रमक सुरुवात केल्यास पाकिस्तानच्या फिरकीपटूंवर दडपण निर्माण होऊ शकते. तसेच या विश्वचषकात आतापर्यंत २२० धावा करणारा फरहान हा पाकिस्तानचा सर्वात धोकादायक फलंदाज ठरू शकतो.
सामन्याचा तपशील: तारीख: २१ फेब्रुवारी २०२६ (शनिवार), ठिकाण: आर. प्रेमदासा स्टेडियम, कोलंबो.