कोलंबो : आयसीसी पुरुष टी ट्वेंडी वर्ल्डकप २०२६ च्या सुपर एट फेरीतला पहिला सामना पावसामुळे रद्द झाला आहे. न्यूझीलंड (Y2) आणि पाकिस्तान (Y3) यांच्यात कोलंबोतील आर. प्रेमदासा स्टेडियम येथे हा सामना होणार होता. पावसामुळे हा सामना रद्द झाला आणि नियमानुसार दोन्ही संघांना प्रत्येकी एक गुण बहाल करण्यात आला आहे.
यंदाच्या वर्ल्डकपमधील पावसामुळे रद्द झालेला हा दुसरा सामना आहे. याआधी १७ फेब्रुवारी रोजी आयर्लंड - झिम्बाब्वे हा साखळी सामना पावसामुळे रद्द झाला होता. त्यावेळीही नियमानुसार दोन्ही संघांना प्रत्येकी एक गुण बहाल करण्यात आला होता. आता रविवार २२ फेब्रुवारी रोजी सुपर एट फेरीचे दोन सामने होणार आहेत. पल्लेकेले आंतरराष्ट्रीय क्रिकेट स्टेडियम येथे इंग्लंड (Y1) - श्रीलंका (Y4) हा सामना भारतीय वेळेनुसार दुपारी तीन वाजता सुरू होणार आहे. तसेच अहमदाबादच्या नरेंद्र मोदी स्टेडियम येथे भारत (X1) - दक्षिण आफ्रिका (X4) हा सामना भारतीय वेळेनुसार संध्याकाळी सात वाजता सुरू होणार आहे.