खळबळजनक व्हिडिओ समोर; ५० हजारांसाठी एक, तर एक लाखासाठी मारल्या जायच्या दोन रेषा
मुंबई : अन्न व औषध प्रशासन मंत्री नरहरी झिरवाळ यांच्या कार्यालयातील लिपिक राजू ढेरिंगे याला लाचलुचपत प्रतिबंधक विभागाने (एसीबी) अटक केल्यानंतर आता या भ्रष्टाचाराचे धागेदोरे अधिक गडद झाले आहेत. या विभागात लाचेची रक्कम घेण्यासाठी चक्क 'कोडवर्ड'चा वापर केला जात असल्याचा खळबळजनक व्हिडिओ समोर आला आहे. मेडिकल परवान्यासाठी फाईलवर मारलेली 'एक रेषा' म्हणजे ५० हजार आणि 'दोन रेषा' म्हणजे १ लाख रुपये, अशा सांकेतिक भाषेत मंत्र्यांच्या दालनात वसुलीचे रॅकेट सुरू असल्याचा आरोप या व्हिडिओ काढणाऱ्या व्यावसायिकाने केला आहे.
मेडिकल व्यावसायिक निर्मल शर्मा यांनी या भ्रष्टाचाराचा पर्दाफाश करण्यासाठी स्वतः पुढाकार घेऊन एक 'स्टिंग ऑपरेशन' केले. शर्मा यांचा मेडिकल परवाना एका महिन्यासाठी निलंबित झाला होता. तो पुन्हा सुरू करण्यासाठी त्यांनी झिरवाळ यांच्या कार्यालयातील रामदास गाडे आणि राजू ढेरिंगे यांची भेट घेतली. यावेळी गाडे यांनी फाईलचा अभ्यास न करता त्यावर केवळ दोन रेषा मारल्या आणि 'राजूशी काय ते बोलून घ्या' असे सुचवले. या 'दोन रेषा' म्हणजेच १ लाख रुपयांची मागणी होती, असा दावा शर्मा यांनी केला आहे. अखेर ५५ हजार रुपयांवर तडजोड झाल्यानंतर हे काम मार्गी लावण्याचे आश्वासन देण्यात आले.
मुख्यमंत्री कार्यालयात तक्रार
१२ फेब्रुवारी रोजी हरिराम घाची यांच्या तक्रारीवरून एसीबीने पहिली कारवाई केली होती. त्यानंतर आता निर्मल शर्मा यांनी थेट मुख्यमंत्री कार्यालयात तक्रार दाखल केली आहे. आपल्या कार्यालयातील कर्मचाऱ्यांच्या या कृत्याबाबत मंत्री नरहरी झिरवाळ यांनी चौकशीचे आदेश दिले असले, तरी मंत्र्यांच्या नाकाखाली इतक्या मोठ्या प्रमाणावर 'अर्थपूर्ण' व्यवहार कसे चालत होते, असा प्रश्न उपस्थित केला जात आहे.
निर्मल शर्मा यांनी या संपूर्ण व्यवहाराचे रेकॉर्डिंग मुख्यमंत्री सचिवालयाकडे सुपूर्द केले आहे. "मंत्रालयात सर्वसामान्यांची कामे अडवून अशा प्रकारे वसुली केली जात असेल, तर पारदर्शकतेचा दावा फोल आहे," अशी संतप्त प्रतिक्रिया शर्मा यांनी दिली आहे. एसीबी आता या नव्या पुराव्यांच्या आधारे रामदास गाडे यांच्यावरही कारवाई करणार का, याकडे लक्ष लागले आहे.