मुंबई : भारतीय क्रिकेटमधील उदयोन्मुख खेळाडू आणि अवघ्या १४ व्या वर्षी चर्चेत आलेला वैभव सूर्यवंशी याच्याबाबत एक बातमी समोर आली आहे. शैक्षणिक वर्षअखेर होणारी (CBSE) दहावीची परीक्षा तो यंदा देणार की नाही याविषयी त्याच्या वडिलांनी उत्तर दिलं आहे.
सोशल मीडियावर हॉलतिकीट व्हायरल
काही दिवसांपासून एक हॉल तिकीट सोशल मीडियावर व्हायरल होत आहे. परीक्षा केंद्रावर सुरक्षेची तयारी वाढवल्याच्या चर्चाही रंगल्या होत्या. मात्र, शाळा प्रशासनाने कोणतीही विशेष सवलत दिली जाणार नसल्याचे आधीच स्पष्ट केले आहे.
बिहारमधील ताजपूर येथे राहणारा वैभव ताजपूर येथील मॉडेस्टी स्कूलचा विद्यार्थी आहे परीक्षेचा अर्जही त्याने भरला होता. परंतु तो सध्या सराव शिबिरे, राष्ट्रीय स्तरावरील सामने आणि विविध स्पर्धांमध्ये गुंतलेला आहे. सलग सामने आणि प्रवासामुळे त्याला अभ्यासाला पुरेसा वेळ देता आला नाही, अशी माहिती समोर आली आहे. कुटुंबीय आणि शाळा व्यवस्थापन यांच्यातील चर्चेनंतरच त्याने यंदा बोर्ड परीक्षा न देण्याचा निर्णय घेतला असल्याचे समजते.
अंडर-१९ विश्वचषकातील दमदार कामगिरी
२०२६ मधील आयसीसी अंडर १९ क्रिकेट विश्वचषक स्पर्धेत त्याने भारतीय संघासाठी उल्लेखनीय योगदान दिले. सात सामन्यांत ६२.७१ च्या सरासरीने ४३९ धावा करत तो सर्वाधिक धावा करणाऱ्या खेळाडूंमध्ये अग्रक्रमावर राहिला. अंतिम सामन्यात इंग्लंड अंडर १९ क्रिकेट संघ विरुद्ध साकारलेली १७५ धावांची खेळी विशेष गाजली. १६९ पेक्षा अधिक स्ट्राईक रेटसह त्याने आक्रमक फलंदाजीचे दर्शन घडवले.