पल्लेकेले : आयसीसी पुरुष टी ट्वेंटी वर्ल्डकपमध्ये गुरुवारी दुपारी झालेल्या साखळी सामन्यात श्रीलंकेने ओमानचा पराभव केला. ओमान विरुद्धचा सामना श्रीलंकेने १०५ धावांनी जिंकला. या सामन्यात श्रीलंकेचा पवन रथनायके सामनावीर झाला. त्याने २८ चेंडूत २१४.२९ च्या स्ट्राईक रेटने एक षटकार आणि आठ चौकार मारत ६० धावा केल्या.
नाणेफेक जिंकून गोलंदाजीचा निर्णय घेणे ओमानला भोवले. प्रथम फलंदाजीसाठी आलेल्या श्रीलंकेने २० षटकांत पाच बाद २२५ धावा केल्या तर ओमानला २० षटकांत ९ बाद १२० धावा करणे जमले. ओमानकडून मोहम्मद नदीमने नाबाद ५३ धावा केल्या. वसीम अलीने २७ धावा केल्या. इतर फलंदाज दोन आकडी वैयक्तिक धावा करू शकले नाही. श्रीलंकेकडून महेश थीकशन आणि दुष्मंथा चामीराने प्रत्येकी दोन तर डुनिथ वेलागे, दुषण हेमंथ आणि कमिंडू मेंडिसने प्रत्येकी एक विकेट घेतली.
याआधी श्रीलंकेकडून कुसल मेंडिसने ६१, पवन रथनायकेने ६० तर कर्णधार असलेल्या दासुन शनाकाने ५० धावा केल्या. कमिंडू मेंडिसनेने नाबाद १९ आणि पथुम निस्सांकाने १३ धावांचे योगदान दिले. कामिल मिश्राराने ८ धावा केल्या तर डुनिथ वेलागेने नाबाद ६ धावा केल्या. ओमानकडून जितेन रामानंदीने २ तर जय ओडेद्रा आणि सुफियान मेहमूदने प्रत्येकी एक विकेट घेतली.
श्रीलंकेसाठी मोठा विजय
ओमान विरुद्धचा श्रीलंकेचा विजय हा यंदाच्या वर्ल्डकपमधील लंकेचा सर्वात मोठा विजय आहे. श्रीलंकेच्या एकूण टी ट्वेंटी क्रिकेट कारकिर्दीचा विचार केल्यास हा दुसऱ्या क्रमांकाचा सर्वात मोठा विजय आहे. तसेच ओमानचा हा टी ट्वेंटी क्रिकेटमधील सर्वात मोठा पराभव आहे. याआधी त्यांचा पाकिस्तान विरूद्धच्या सामन्यात ९३ धावांनी पराभव झाला होता.
श्रीलंकेने मोठ्या फरकाने मिळवलेले सर्वोत्तम चार विजय
- १७२ धावांनी विजय विरुद्ध केनिया, जोबर्ग, २००७ विश्वचषक
- १०५ धावांनी विजय विरुद्ध ओमान, पल्लेकेले, २०२६ विश्वचषक*
- ८३ धावांनी विजय विरुद्ध नेदरलँड, ग्रोस आयलेट, २०२४ विश्वचषक
- ८२ धावांनी विजय विरुद्ध झिम्बाब्वे, हंबनटोटा, २०१२ विश्वचषक