दिल्ली: शनिवार ७ फेब्रुवारी २०२६ पासून आयसीसी चा टी२० विश्वचषक सुरू झाला आहे. आज म्हणजेच मंगळवार १० फेब्रुवारी रोजी या स्पर्धेतील दहावा सामना खेळला गेला. दिल्लीच्या अरुण जेटली स्टेडियमवर नेदरलॅंड्स विरुद्ध नामिबिया या दोन संघांमध्ये सामना रंगला. यावेळी नेदरलॅंड्सने ७ विकेट्सने नामिबिया संघावर विजय मिळवला. तर बास दी लीडे ‘प्लेयर ऑफ दी मॅच’ चा मानकरी ठरला.
हा सामना जिंकताच नेदरलॅंड्स ग्रुप ए च्या अंकतालिकेत दुसऱ्या स्थानी आला आहे. पाकिस्तान आणि नेदरलँड्सचे गुण सारखे असले तरी नेदरलॅंड्सचा नेट रनरेट पाकिस्तानच्या नेट रनरेटपेक्षा उत्तम आहे. आपला रननेट उत्तम करण्यासाठी आता पाकिस्तानला यूएसए सोबत होणाऱ्या सामन्यात जिंकणं गरजेचं आहे.
असा रंगला सामना :
या सामन्यासाठी झालेल्या नाणेफेकीत नेदरलॅंड्सचा कर्णधार स्कॉट एडवर्ड्सने प्रथम गोलंदाजी करण्याचा निर्णय घेतला. भारताच्या मैदानावर पहिलाच आंतरराष्ट्रीय सामना खेळणाऱ्या नामिबियाची सुरूवात चांगली झाली नाही. त्यांनी १० धावसंख्येवरच पहिली विकेट गमावली. दुसऱ्या विकेटसाठी लोफ्टी इटॉन आणि जॅन फ्रायलिंकने ५० धावांची भागीदारी केली.
लोफ्टी ४२ धावा करत बाद झाला. त्यानंतर एकही मोठी भागीदारी झाली नाही. त्यामुळे नामिबियाचा डाव २० षटकात ८ बाद १५६ धावसंख्येवरच संपला. या डावात नेदरलॅंड्सच्या ८ खेळाडूंनी गोलंदाजी केली. त्यामध्ये लोगन वॅन बीक आणि लीडे यांनी सर्वाधिक विकेट्स घेतल्या. यामध्ये लीडेने ३ षटकात २० धावा देत २ विकेट्स, तर लोगनने ३ षटकात १३ धावा देत २ विकेट्स घेतल्या.
लक्ष्याचा पाठलाग करताना नेदरलॅंड्सची पहिली विकेट १६ धावांवर, तर दुसरी ४६ धावांवर पडली. त्यानंतर मात्र कोलिन ऍकरमन आणि लीडे यांनी तिसऱ्या विकेटसाठी ७० धावांची भागीदारी करत संघाचा विजय सोपा केला. कोलिन ३२ धावा करत बाद झाला. त्यानंतर लीडेने एडवर्ड्सच्या साथीने चौकार-षटकार मारले. दोघांनी २४ चेंडूत ४३धावांची भागीदारी केली.
यामध्ये एडवर्ड्स ९ चेंडूत एक चौकार-षटकार मारत १८ धावांवर नाबाद राहिला. तसेच लीडे ४८ चेंडूत ७२ धावा करत नाबाद राहिला. त्यामध्ये त्याने ५ चौकार आणि ४ षटकार मारले. नेदलॅंड्सने १८व्या षटकाच्या शेवटच्या चेंडूवर विजय मिळवला.
आता नेदरलॅंड्सचा पुढील सामना यूएसएविरुद्ध १३ फेब्रुवारीला आणि नामिबियाचा सामना १२ फेब्रुवारीला भारताविरुद्ध होणार आहे.