मुंबई : ‘सैराट’ चित्रपटातून प्रेक्षकांच्या मनात घर करणारी अभिनेत्री रिंकू राजगुरू सध्या तिच्या आगामी चित्रपटांमुळे चर्चेत आहे. ‘आशा’ या चित्रपटानंतर आता तिचा नवा सिनेमा ‘पुन्हा एकदा साडे माडे तीन’ प्रेक्षकांच्या भेटीला येत असून, या चित्रपटाच्या प्रमोशनदरम्यान रिंकूने तिच्या वैयक्तिक आयुष्याबाबत स्पष्ट भूमिका मांडली आहे.
एका मुलाखतीत रिलेशनशिप आणि लग्नाबाबत बोलताना रिंकू राजगुरूने सध्याच्या पिढीतील नातेसंबंधांवर आपलं मत मांडत, “मी बॉयफ्रेंड बनवणारी मुलगी नाही. मला थेट लग्नावर विश्वास आहे,” असं स्पष्टपणे सांगितलं. तिच्या या वक्तव्यामुळे चाहत्यांमध्ये आणि सोशल मीडियावर चर्चा सुरू झाली आहे.
रिंकू यापूर्वीही अनेक वेळा प्रेम, लग्न आणि जोडीदाराबाबत तिचा पारंपरिक दृष्टिकोन मांडत आली आहे. जेन-झी पिढीतील असूनही सध्याच्या रिलेशनशिप पद्धतीशी आपण सहमत नसल्याचं तिनं याआधीही सांगितलं आहे.
प्रेमाबाबत बोलताना रिंकूने हलक्याफुलक्या शैलीत प्रतिक्रिया देत, “मी प्रेमात पडत नाही, माझे डोळे बघूनच लोक माझ्या प्रेमात पडतात,” असंही नमूद केलं. तिच्या या विधानाची सध्या चाहत्यांमध्ये विशेष चर्चा होत आहे.
दरम्यान, रिंकू राजगुरूचं नाव यापूर्वी अभिनेता आकाश ठोसर आणि कृष्णराज महाडिक यांच्यासोबत जोडण्यात आलं होतं. मात्र या दोन्ही प्रकरणांत केवळ मैत्री असल्याचं स्पष्ट झाल्यानंतर रिलेशनशिपच्या चर्चांना पूर्णविराम मिळाला होता. कामाच्या आघाडीवर, ‘पुन्हा एकदा साडे माडे तीन’ हा चित्रपट १३ फेब्रुवारी रोजी प्रदर्शित होत असून, या चित्रपटाकडं प्रेक्षकांचं लक्ष लागलं आहे.