शनिवारपासून सुरू होणार टी२० क्रिकेटचा थरार

मुंबई : पुरुषांचा आयसीसी टी ट्वेंटी विश्वचषक शनिवार ७ फेब्रुवारी २०२६ पासून सुरू होत आहे. या विश्वचषकाचा अंतिम सामना रविवार ८ मार्च २०२६ रोजी आहे. तब्बल २९ दिवस टी ट्वेंटी विश्वचषक स्पर्धा रंगणार आहे. भारत आणि श्रीलंका या दोन देशांनी यंदा विश्वचषकाचे संयुक्तरित्या आयोजन केले आहे. यंदाच्या विश्वचषकात वीस संघ सहभागी झाले आहेत. या संघांची प्रत्येकी पाच अशा पद्धतीने ए, बी, सी, डी या चार गटांमध्ये विभागणी करण्यात आली आहे. गतविजेत्या भारताचा सलामीचा सामना मुंबईच्या वानखेडे स्टेडियमवर होणार आहे.

स्पर्धेच्या पहिल्या म्हणजे शनिवार ७ फेब्रुवारी रोजी तीन साखळी सामने होणार आहेत. श्रीलंकेतील कोलंबो येथे पाकिस्तान आणि नेदरलँड्स यांच्यात पहिला सामना होईल. कोलकात्यात वेस्ट इंडिज आणि स्कॉटलंड यांच्यात सामना रंगणार आहे. मुंबईत भारत आणि अमेरिका यांच्यात लढत होणार आहे.

गट विभागणी (Groups)

1. गट A: भारत, पाकिस्तान, अमेरिका, नेदरलँड, नामिबिया.


2. गट B: ऑस्ट्रेलिया, श्रीलंका, आयर्लंड, झिम्बाब्वे, ओमान.


3. गट C: इंग्लंड, वेस्ट इंडीज, नेपाळ, स्कॉटलंड, इटली.


4. गट D: दक्षिण आफ्रिका, न्यूझीलंड, अफगाणिस्तान, संयुक्त अरब अमिराती, कॅनडा.

पहिल्या टप्प्यात गट फेरी अर्थात साखळी सामन्यांची फेरी होणार आहे. यात प्रत्येक संघ गटातील इतर चार संघांशी प्रत्येकी एक सामना खेळेल. प्रत्येक गटातील अव्वल दोन संघ सुपर 8 या फेरीत जातील. नंतर चार - चार संघांचे दोन गट केले जातील. सुपर 8 या फेरीअंती दोन्ही गटातून सर्वोत्तम २-२ संघ उपांत्य फेरीला पात्र ठरतील. यानंतर दोन उपांत्य सामने होतील. यातील पहिला उपांत्य सामना कोलंबो किंवा कोलकाता येथे तर दुसरा उपांत्य सामना मुंबईत वानखेडेवर होणार आहे. अंतिम सामना अहमदाबाद किंवा कोलंबो येथे होणार आहे.

T20 विश्वचषक वेळापत्रक २०२६

• २१ फेब्रुवारीपासून सुपर-8 चे सामने सुरु होतील.


• पहिला उपांत्य सामना : ४ मार्च (कोलंबो किंवा कोलकाता)


• दुसरा उपांत्य सामना : ५ मार्च (मुंबई) – जर भारत पात्र झाला तर हा सामना वानखेडेवर होईल.


• अंतिम सामना : ८ मार्च (अहमदाबाद किंवा कोलंबो)