पूर्व जैंतिया हिल्स : मेघालयमधील पूर्व जैंतिया हिल्स (East Jaintia Hills district) जिल्ह्यातील कोळसा खाणीत मोठी दुर्घटना झाली. ही खाण बेकायदेशिररित्या चालवली जात होती. खाणीत काम सुरू असताना थांगस्कू भागात स्फोट झाला. या दुर्घटनेत आतापर्यंत १८ जणांचा मृत्यू झाला आहे आणि एक जण भाजला आहे. मृतांच्या संख्येत वाढ होण्याची भीती व्यक्त होत आहे. दुर्घटनेची माहिती मिळताच पंतप्रधान नरेंद्र मोदींनी शोक प्रकट केला. पंतप्रधान कार्यालयाने नियमानुसार मृतांच्या वारसांना दोन लाख रुपयांची मदत जहीर केली. दुर्घटनेत जखमी झालेल्या प्रत्येकाला ५० हजार रुपयांची मदत जाहीर करण्यात आली आहे.
दुर्घटनेमुळे कोळसा खाणीत काम करत असलेले अनेकजण अडकून पडले आहेत. खाणीत अडकलेल्यांच्या सुटकेचे प्रयत्न सुरू आहेत. घटनास्थळी मदतकार्य सुरू आहे, असे पोलीस महासंचालक आय नोंगरांग यांनी सांगितले. दुर्घटना झाली त्यावेळी खाणीत नेमके किती जण कार्यरत होते हे अद्याप समजलेले नाही. दुर्घटनेत भाजलेल्या व्यक्तीला प्रथमोपचारांनंतर शिलाँग येथील मोठ्या रुग्णालयात दाखल केले आहे.
खाणीत झालेल्या स्फोटाची सखोल पोलीस चौकशी होणार असल्याची माहिती पोलिसांनी दिली आहे. स्फोट नेमका कशाचा होता हे तपासातून कळेल, असेही पोलिसांनी सांगितले.