मुंबई : मुंबईतील गोरेगाव परिसरात हायड्रोजन गॅस भरलेल्या फुग्यांमुळे मोठा धोका निर्माण झाल्याची घटना समोर आली आहे. गोरेगाव पश्चिमेकडील एका निवासी इमारतीत लिफ्टमधून फुगे नेत असताना अचानक स्फोट झाल्याने एकच खळबळ उडाली. सुदैवाने या घटनेत जीवितहानी टळली असून तिघे जण किरकोळ जखमी झाले आहेत.
ही घटना गोरेगाव (पश्चिम) येथील पेट्रोल पंपाजवळ असलेल्या अनमोल टॉवर इमारतीत घडली. मिळालेल्या माहितीनुसार, एका वाढदिवसाच्या कार्यक्रमासाठी हायड्रोजन गॅस भरलेले फुगे आणण्यात आले होते. हे फुगे लिफ्टमधून वरच्या मजल्यावर नेत असताना लिफ्टमध्ये अचानक स्फोट झाला.
घटनेच्या वेळी लिफ्टमध्ये एएक फुगेवाला एक तरुण आणि एक तरुणी उपस्थित होती. स्फोट होताच लिफ्टचे दरवाजे आपोआप उघडले गेले आणि तिघांनी तात्काळ बाहेर पडत आपला जीव वाचवला. या घटनेचे दृश्य इमारतीतील सीसीटीव्ही कॅमेऱ्यात कैद झाले असून त्यामध्ये स्फोटाची तीव्रता स्पष्टपणे दिसून येते.
हायड्रोजन हा अत्यंत ज्वलनशील व स्फोटक गॅस असल्याने बंद जागेत त्याचा वापर केल्यास मोठा धोका संभवतो, असे तज्ज्ञांचे मत आहे. या प्रकरणाची गंभीर दखल घेत गोरेगाव पोलिसांनी संबंधित गॅस फुगे विक्रेत्यावर गुन्हा दाखल केला आहे. स्फोट नेमका कशामुळे झाला, याचा तपास पोलीस करत आहेत.
दरम्यान, या घटनेनंतर नागरिकांमध्ये भीतीचे वातावरण निर्माण झाले असून सोसायटी प्रशासन आणि रहिवाशांना अशा धोकादायक प्रकारांबाबत सतर्क राहण्याचे आवाहन करण्यात आले आहे. सार्वजनिक व बंद जागांमध्ये हायड्रोजन फुग्यांचा वापर टाळावा, असेही सांगण्यात येत आहे.