मुंबई : खार पश्चिम येथे नवजात बालिकेला कचऱ्याच्या पिशवीत भरून इमारतीतील रिफ्युजी रूममध्ये फेकून दिल्याचा धक्कादायक प्रकार समोर आला आहे. निर्भया पथकामुळे बालिकेचे प्राण थोडक्यात वाचले आहे, तिच्यावर रुग्णालयात उपचार सुरु आहेत. या प्रकरणी पोलिसांनी छत्तीसगडची रहिवासी असलेल्या २० वर्षीय तरुणीवर गुन्हा दाखल केला आहे.
ओम निर्माण इमारतीच्या १४ व १५ मजल्याच्या मधील रिफ्युजी रुममध्ये कचऱ्याच्या पिशवीत नवजात बालिका दिसल्यामुळे नागरिकांनी लगेच खार पोलीस ठाण्यात कळवलं. पोलिसांना ही घटना कळताच निर्भया पथक तातडीने घटनास्थळी हजर झाले. निर्भया पथकाच्या तत्परतेमुळे बालिकेचे थोडक्यात प्राण जाता जाता वाचले.वैद्यकीय उपचारासाठी तिला तातडीने रुग्णालयात दाखल करण्यात आले आहे. सध्या बालिकेवर भाभा रुग्णालय उपचार सुरु आहे.
अविवाहित म्हणून पोटच्या पोरीचा त्याग
पोलिसांनी केलेल्या चौकशीत अक्षरशः धक्कादायक माहिती समोर आली आहे. ओम निर्माण इमारतीतील १५ व्या मजल्यावर एका कुटूंबाकडे घरकाम करणाऱ्या तरुणीने एका गोंडस मुलीला जन्म दिला. परंतु, ती अविवाहित असल्यामुळे एकटी मुलीचं संगोपन कस करणार हा प्रश्न निर्माण झाल्यामुळे तिने त्या मुलीला तिकडेच सोडण्याचा निर्णय घेतला. शेवटी तिने त्या बालिकेला कचऱ्याच्या पिशवीत ठेवून रिफ्युजी रूममध्ये टाकल्याची कबुली पोलिसांना दिली. प्रस्तुतीनंतर या तरुणीची प्रकृती खालावल्याने तिलाही भाभा रुग्णालयात दाखल करण्यात आले.