मुंबई: भारत युरोप मुक्त व्यापार करारानंतर आता भारत अमेरिका या दोन देशांमध्ये मुक्त करार (US-India Trade Deal) झाला आहे. स्वतः पंतप्रधान नरेंद्र मोदी यांनी याची माहिती दिली आहे. मोदी यांनी सोमवारी (२ फेब्रुवारी) अमेरिकेचे राष्ट्राध्यक्ष डोनाल्ड ट्रम्प यांच्याशी फोनवरून झालेल्या संभाषणानंतर ही घोषणा केली. विशेष म्हणजे या करारामुळे अमेरिकेने भारतावर लावलेल्या टॅरिफ मध्ये मोठी कपात झाली आहे. त्यामुळे टॅरिफ आता २५% वरून १८% झाला आहे.
या करारामुळे भारतीय बाजारपेठेत आज सकाळपासून मोठी उलथापालथ सुरू झाली आहे. अमेरिकेने टॅरिफ कमी केल्याने भारतीय निर्यातदारांना मोठा दिलासा मिळाला आहे. याचे सकारात्मक पडसाद शेअर बाजारात उमटले आहेत. त्यामुळे आज (मंगळवार ३ फेब्रुवारी) सकाळपासून शेअर बाजारात मोठी उसळी पाहायला मिळत आहेत. तर दुसरीकडे मात्र सोने आणि चांदीचे भावही वाढले आहेत.
प्रतितोळा तब्बल साडेचार हजारांची वाढ :
सध्याच्या दरानुसार, एक किलो चांदीचा दर (Silver rates) तब्बल २० हजारांच्या आसपास वाढला होता. त्यामुळे एक किलो चांदीचा दर अडीच लाखांच्या पार गेला. तर गेल्या काही दिवसांत भावात प्रचंड चढउतार झाल्याने चर्चेत असलेल्या सोन्याचा भावही (Gold rates) आज वधारला आहे. आज बाजार उघडताच सोन्याचा दर प्रतितोळा तब्बल साडेचार हजार रुपयांनी वधारला. यामुळे सध्या १० ग्रॅम सोन्याचा भाव १ लाख ४८ हजार रुपयांच्या पातळीवर जाऊन पोहोचला आहे.