आजच्या स्मार्ट होममध्ये टीव्ही हा सर्वाधिक वापरला जाणारा इलेक्ट्रॉनिक डिव्हाइस ठरला आहे. दिवसातील अनेक तास आपण टीव्हीवर मालिका, चित्रपट, रिअॅलिटी शो, OTT कंटेंट किंवा गेमिंगचा आनंद घेतो. मात्र, हे करत असताना टीव्ही किती वीज वापरतो आणि त्याचा थेट परिणाम वीज बिलावर होतो, याकडे अनेकांचे लक्ष जात नाही. प्रत्यक्षात, काही लहान पण महत्त्वाच्या सेटिंग बदलून तुम्ही टीव्हीमुळे वाढणारे वीज बिल लक्षणीयरीत्या कमी करू शकता.
टीव्हीमध्ये सर्वाधिक वीज वापर ब्राइटनेस आणि बॅकलाइटमुळे होतो. फॅक्टरी सेटिंग्जमध्ये हे दोन्ही पर्याय जास्त प्रमाणात ठेवलेले असतात. त्यामुळे पिक्चर सेटिंगमध्ये जाऊन ब्राइटनेस आणि बॅकलाइट ६० ते ७० टक्क्यांपर्यंत कमी करा. खोलीतील प्रकाशानुसार हे अॅडजस्ट केल्यास वीज बचत होईलच, शिवाय डोळ्यांवरील ताणही कमी होईल. अनेकजण टीव्ही कायम Vivid किंवा Dynamic Mode वर ठेवतात, जो अधिक वीज खर्च करणारा असतो. दैनंदिन वापरासाठी Standard किंवा Eco Mode निवडणे फायदेशीर ठरते. Eco Mode आपोआप ब्राइटनेस आणि पॉवर युसेज नियंत्रित करतो, ज्यामुळे वीजेचा खर्च कमी होतो.
कधी कधी टीव्ही सुरू असतानाच आपल्याला झोप लागते किंवा आपण खोलीबाहेर जातो. अशावेळी Auto Power Off आणि Sleep Timer ही फीचर्स उपयुक्त ठरतात. १०–१५ मिनिटे कोणतीही हालचाल नसल्यास टीव्ही आपोआप बंद होईल, अशी सेटिंग केल्यास अनावश्यक वीज वाया जाणार नाही. टीव्ही बंद केल्यानंतरही प्लग इन ठेवला तर स्टँडबाय मोडमध्ये तो वीज वापरत राहतो. त्यामुळे वापर नसताना टीव्ही पूर्णपणे स्विच ऑफ करणे किंवा स्मार्ट पॉवर स्ट्रिपचा वापर करणे अधिक योग्य आहे.
तसेच Smart TV मधील Bluetooth, Wi-Fi Scan, Voice Assistant यांसारखी अनावश्यक फीचर्स आणि अॅप्स सतत ऑन राहिल्यास बॅकग्राउंडमध्ये वीज खर्च होत राहते. गरज नसल्यास ही फीचर्स बंद ठेवल्यास टीव्ही अधिक ऊर्जा-कार्यक्षम पद्धतीने काम करेल आणि तुमचे वीज बिलही नियंत्रणात राहील.