मुंबई : सेठ गोर्धनदास सुंदरदास वैद्यकीय महाविद्यालय व राजे एडवर्ड स्मारक (के. ई. एम.) रुग्णालयाचे नाव बदलण्यात यावे असे सूचना वजा निर्देश कौशल्य, रोजगार, उद्योजकता व नाविन्यता मंत्री तथा मुंबई उपनगर जिल्ह्याचे सहपालकमंत्री मंगलप्रभात लोढा यांनी दिले. पंतप्रधान नरेंद्र मोदी यांच्या नवीन धोरणानुसार या रुग्णालयाचे नामांतर करण्यात यावे असे त्यांनी म्हटले. दरम्यान मुंबई महापालिकेचा अधिनियमात ब्रिटिश कालीन इंग्रजी नावे बदलण्याची स्पष्ट तरतूद असून त्याद्वारे वास्तू, रस्ते यांची नावे बदलून नव्याने ठेवली जात आहेत.
सेठ गोर्धनदास सुंदरदास महाविद्यालय व राजे एडवर्ड स्मारक रुग्णालयाच्या शतक महोत्सवी समारंभात गुरुवारी लोढा उपस्थितांशी संवाद साधताना बोलत होते. यावेळी आमदार कालिदास कोळंबकर, उपआयुक्त (सार्वजनिक आरोग्य) शरद उघडे, संचालक (वैद्यकीय शिक्षण व प्रमुख रुग्णालये) डॉ. शैलेश मोहिते, अधिष्ठाता (केईएम रुग्णालय) डॉ. संगीता रावत आदी मान्यवर उपस्थित होते. महाविद्यालयीन विद्यार्थ्यांना वैद्यकीय क्षेत्रातील देशभरातील तज्ज्ञांचे मार्गदर्शन लाभावे, या अनुषंगाने संवाद केंद्र (कम्युनिकेशन सेंटर) उभारण्यात यावे. या केंद्रामुळे विद्यार्थ्यांना देशभरातील तज्ज्ञ व्यक्तींशी जोडले जाणे शक्य होईल. वैद्यकीय क्षेत्रात मोठी स्वप्न पाहणाऱया विद्यार्थ्यांसाठी हे केंद्र मार्गदर्शक ठरावे, असेही लोढा यावेळी म्हणाले. येणाऱ्या नागरिकांच्या सुविधेसाठी अधिकाधिक सुविधा उपलब्ध करून देतानाच कृत्रिम बुद्धिमत्ता आधारित तंत्रज्ञानस्नेही सुविधा उपलब्ध करून देण्यासह केंद्र, राज्य सरकारच्या आरोग्य योजनांची माहिती नागरिकांना देण्यासाठी विशेष प्रयत्न करण्याचे निर्देश लोढा यांनी दिले.
आरोग्य सेवा गुणवत्तापूर्ण आणि कार्यक्षमपणे उपलब्ध करून देतानाच डिजिटल तंत्रज्ञाचाही वापर केईएम रुग्णालयात प्रभावीपणे करण्यात आला आहे. ‘रुग्णालय व्यवस्थापन माहिती प्रणाली’ (हॉस्पिटल मॅनेजमेंट इन्फॉर्मेशन सिस्टिम)या सुविधेचा अतिशय प्रभावीपणे वापर करण्यासाठी केईएम रुग्णालय सज्ज झाले आहे. लवकरच संपूर्ण क्षमतेने या प्रणालीचा वापर रुग्णालयात सुरु होईल, अशी माहिती उपायुक्त शरद उघडे यांनी कार्यक्रमादरम्यान दिली. रुग्णालयातील रुग्णशय्या क्षमता ही २ हजार असून येथे प्रतिदिन ६ हजार बाह्यरुग्ण हाताळण्याची क्षमता आहे. के. ई. एम. रुग्णालयातील डॉक्टर्स, परिचारिका, चतुर्थ श्रेणी कर्मचारी या सगळ्यांचे योगदान यामध्ये आहे. रुग्णांच्या सुविधेसाठी येत्या काळात ‘सर्व्हीस टॉवर’ निर्माण करण्यात येत आहे. या टॉवरच्या माध्यमातून रुग्णांना विविध चाचण्यांची सुविधा एकाच छताखाली उपलब्ध करुन देण्याचा रुग्णालय प्रशासनाचा मानस असल्याची माहिती के.ई.एम. रुग्णालयाच्या अधिष्ठाता डॉ. संगीता रावत यांनी दिली. वैद्यकीय महाविद्यालयात शिक्षण घेणाऱया विद्यार्थ्यांसाठी १२०० विद्यार्थी क्षमता असलेल्या वसतिगृहाची सुविधा लवकरच उपलब्ध होत आहे, अशी माहिती देखील त्यांनी यावेळी दिली