अणसूर मडकीलवाडीत खळबळजनक घटना
वेंगुर्ले : वेंगुर्ला तालुक्यातील अणसूर मडकीलवाडी येथे मुलानेच जन्मदात्या आईवर बंदुकीने गोळी झाडून तिचा निर्दयी खून केला. मयत महिलेचे नाव वासंती वासुदेव सरमळकर (वय ६५ वर्षे) असे आहे. तर या प्रकरणात दुष्कृत्त करणारा आरोपी मुलगा उमेश वासुदेव सरमळकर (वय ४०) असे त्याचे नाव आहे. दारूचे व्यसन आणि कर्जाच्या कारणावरून हा खून झाला आहे. या घटनेमुळे वेंगुर्ले तालुक्यासह सिंधुदुर्गात खळबळ उडाली. याप्रकरणी वेंगुर्ला पोलीस ठाण्यात गुन्हा दाखल करण्यात आला आहे. व्यसनामुळे माणूस कोणत्याही थराला जाऊ शकतो हे या घटनेने समोर आले आहे. वेंगुर्ले तालुक्यात मुलानेच आईचा खून केल्याची ही पहिलीच दुर्घटना असून या दुष्कृत्याबाबत संताप व्यक्त केला जात आहे. ही घटना दि. १४ जानेवारी २०२६ रोजी रात्री सुमारे ८.३० वाजण्याच्या सुमारास अणसुर पाल मडकीलवाडी, वेंगुर्ला येथे घडली. या प्रकरणी मध्यरात्री वेंगुर्ला पोलीस ठाण्यात गुन्हा दाखल करण्यात आला आहे. या घटनेची फिर्याद जागृती जयेश सरमळकर (मूळ राहणार अणसुर मडकीलवाडी, सध्या राहणार विनायक रेसिडेन्सी, कॅम्प वेंगुर्ला) यांनी दिली आहे.
आरोपी उमेश सरमळकर याने विविध बँका व बचत गटांकडून कर्ज घेतले होते. तसेच त्याला दारूचे व्यसन होते. या कर्जाच्या कारणावरून आणि दारूच्या विषयावरून मयत आई व आरोपी मुलामध्ये वाद व भांडण होते. या कारणासह ती भावाच्या बाजूने जास्त आहे, या साऱ्या रागातून त्याने खून करण्याचे टोकाचे पाऊल उचलले, असा संशय आहे.
सदर खून प्रकरणातील संशयित आरोपी उमेश याच्या विरोधात वेंगुर्ले पोलीस ठाण्यात बीएनएस कलम १०३(३) तसेच शस्त्र अधिनियम १९५९ चे कलम ३, २५, २७, २९ आणि महाराष्ट्र पोलीस अधिनियम १९५१ चे कलम ३७(१), १३५ अन्वये गुन्हा दाखल करण्यात आला आहे. आरोपीची तत्काळ अटक करण्यात आली. त्याला कुडाळ न्यायालया मध्ये हजर केले असता न्यायाधीशांनी पाच दिवसांची पोलीस कोठडी सुनावली आहे.