डोंबिवली : डोंबिवली पूर्वेला स्टेशनकडे येण्याजाण्याच्या सर्व लहानमोठ्या रस्त्यांवर फेरीवाल्यांची आणि छोट्या दुकानांची गर्दी झाली आहे. अनेक व्यावसायिक अनधिकृतरित्या रस्त्यावरच व्यवसाय करत आहेत. यामुळे वाहतुकीला आणि पादचाऱ्यांना अडचणींना सामोरे जावे लागत आहे. डोंबिवली स्टेशन परिसरात येणे जाणे कठीण झाले आहे. फेरीवाला हटाव पथकाला सर्व काही माहिती आहे पण ते वेळकाढूपणा करतात आणि कारवाई टाळतात. यामुळे परिस्थितीत अधिकाधिक बिकट होत आहे.
ग प्रभागाच्या अंतर्गत डॉ. रॉथ, उर्सेकरकर वाडी, रामनगर वाहतूक शाखा रस्ता येतो. या प्रभागातील फेरीवाला हटाव पथकातील कामगार हे पालिकेच्या डोंबिवली विभागीय कार्यालयात सात वाजल्यापासून टिंगलटवाळ्या करत बसलेले असतात. अनेक पादचारी पालिका कार्यालयात येऊन ग प्रभाग फेरीवाला हटाव पथकातील कामगारांना डॉ. रॉथ रस्ता, मधुबन गल्ली रस्ता, उर्सेकरवाडी भागातील रस्ता, रामनगर वाहतूक शाखा ते स्वामी समर्थ मठ भागातील फेरीवाले रस्त्यावरून उठवा म्हणून मागणी करत आहेत.
नागरिकांच्या म्हणण्यानुसार, ग प्रभागातील काही कर्मचारी राजकीय दबावाखाली काम करत आहेत. फेरीवाल्यांवर कारवाई करण्यास टाळाटाळ करत आहेत. निवडणूक काळाचा गैरफायदा घेत फेरीवाल्यांनी रस्ते अडवून व्यवसाय सुरू केल्याचे चित्र आहे. “पालिका प्रशासनाने डोंबिवली पूर्व रेल्वे स्थानक परिसर फेरीवाल्यांना आंदण दिला आहे का?” असा संतप्त सवाल नागरिक उपस्थित करत आहेत.
