देशात आणीबाणी जाहीर, रस्त्यांवर रणगाड्यांचा संचार
नवी दिल्ली : लॅटिन अमेरिकेतील राष्ट्र व्हेनेझुएला व अमेरिका यांच्यातील संघर्ष पेटला असून शनिवारी सकाळी अमेरिकेने व्हेनेझुएलाची राजधानी कराकसवर हवाई हल्ले केले. त्यानंतर काही तासात अमेरिकन सैन्याने व्हेनेझुएलाचे अध्यक्ष निकोलस मादुरो व त्यांच्या पत्नीला ताब्यात घेतल्याचा दावा अमेरिकेचे राष्ट्राध्यक्ष डोनाल्ड ट्रम्प यांनी केला आहे. डोनाल्ड ट्रम्प यांनी ट्रुथ या सोशल मीडिया साईटवरील हँडलवर याची माहिती दिली. ते म्हणाले, अमेरिकेने शनिवारी व्हेनेझुएला आणि त्यांच्या नेत्यांविरुद्ध मोठी कारवाई केली. अमेरिकन सैन्याने या कारवाईत व्हेनेझुएलाचे अध्यक्ष निकोलस मादुरो व त्यांच्या पत्नीला ताब्यात घेतले असून देशाबाहेर काढले आहे.
व्हेनेझुएलाची राजधानी कराकसमध्ये शनिवारी पहाटे जोरदार स्फोट झाले. शहरामध्ये एकामागून एक मोठ्या आवाजाचे धमाके ऐकू आले. स्थानिक वेळेनुसार पहिला स्फोट रात्री साधारण १.५० वाजता झाला. त्यानंतर काही भागांमध्ये वीज पुरवठा खंडित झाला. आकाशात विमानांसारखे आवाज ऐकू येत होते. सोशल मीडियावर समोर आलेल्या काही व्हिडीओंमध्ये रात्रीच्या अंधारात धुराचे मोठे लोट दिसत आहेत. राष्ट्रपती भवनाच्या परिसरात लष्करी जवान पहारा देत होते. व्हेनेझुएलाच्या सरकारने निवेदन जारी करत अमेरिकेवर हल्ल्याचा आरोप केला.
राजधानी कराकससह मिरांडा, अरगुआ आणि ला गुइरा या राज्यांमध्ये नागरी आणि लष्करी ठिकाणांवर हल्ले करण्यात आले. ‘ही कारवाई म्हणजे अमेरिकेचे थेट लष्करी आक्रमण आहे. अशा प्रकारचे प्रयत्न यशस्वी होणार नाहीत,’ असा इशाराही निवेदनात देण्यात आला आहे.
राजधानीसह संपूर्ण देशात तणावाचे वातावरण
या घडामोडींच्या पार्श्वभूमीवर अमेरिकेने आपल्या विमानांसाठी व्हेनेझुएलाचे संपूर्ण हवाई क्षेत्र बंद केल्याचे सांगितले जात आहे. याआधीही अमेरिका व्हेनेझुएलामध्ये अमली पदार्थांच्या तस्करीविरोधात कठोर कारवाईचे संकेत देत होती. अमेरिकेचे अध्यक्ष डोनाल्ड ट्रम्प यांनी यापूर्वी व्हेनेझुएलाविरोधात थेट लष्करी कारवाईची शक्यता नाकारलेली नाही, असेही त्यांनी स्पष्ट केले होते. सध्या कराकसमध्ये कडेकोट सुरक्षा व्यवस्था तैनात असून लष्करी हालचाली वाढल्या आहेत. स्फोटांचे नेमकं कारण काय, याबाबत अजून स्पष्ट माहिती समोर आलेली नसली तरी राजधानीसह संपूर्ण देशात तणावाचे वातावरण आहे.