‘हॅप्पी न्यू इयर’चा एक मेसेज करू शकतो बँक खाते रिकामे

सफाळे पोलिसांकडून सायबर स्कॅमबाबत हाय अलर्ट

सफाळे : नवीन वर्षाच्या स्वागताचा उत्साह सर्वत्र असतानाच, सायबर गुन्हेगारांनी आता 'शुभेच्छांच्या' नावाखाली नागरिकांना लुटण्याचे नवे जाळे विणले आहे. व्हॉट्सॲप आणि सोशल मीडियावर येणारे 'हॅप्पी न्यू इयर'चे मेसेज तुमच्या बँक खात्यावर डल्ला मारू शकतात, असा इशारा देत सफाळे पोलिसांनी नागरिकांना सतर्क राहण्याचे आवाहन केले आहे.

सायबर गुन्हेगार सध्या व्हॉट्सॲप, एसएमएस आणि फेसबुकवर आकर्षक शुभेच्छांचे मेसेज पाठवत आहेत. यामध्ये 'फ्री गिफ्ट', 'बक्षीस' किंवा 'डिस्काउंट कूपन'चे आमिष दाखवून एक लिंक दिली जाते.

या लिंकवर क्लिक करताच मोबाईलमध्ये घातक 'मालवेअर' किंवा व्हायरस इन्स्टॉल होतो. याद्वारे गुन्हेगार तुमच्या मोबाईलचा ताबा घेऊन तुमची वैयक्तिक माहिती, ओटीपी आणि बँकिंग डिटेल्स चोरून खाते रिकामे करत आहेत.

पोलिसांकडून 'या' खबरदारीच्या सूचना :

•  अनोळखी लिंक टाळा: व्हॉट्सॲॅपवर आलेल्या कोणत्याही संशयास्पद किंवा अनोळखी लिंकवर क्लिक करू नका.


•  अॅप्स डाऊनलोड करू नका: मेसेजद्वारे पाठवलेले कोणतेही APK किंवा फाईल्स डाऊनलोड करू नका. केवळ अधिकृत 'Play Store' चाच वापर करा.


•  गोपनीय माहिती शेअर करू नका: बँक कधीही फोनवर किंवा लिंकद्वारे पिन किंवा ओटीपी मागत नाही, हे लक्षात ठेवा.


•  सॉफ्टवेअर अपडेट ठेवा: आपल्या मोबाईलचे सिक्युरिटी सॉफ्टवेअर वेळोवेळी अपडेट करा.