खा. नरेश म्हस्केंच्या मुलाच्या उमेदवारीला शिवसेनेचा विरोध
ठाणे : ठाणे महापालिका निवडणुकांच्या पार्श्वभूमीवर घराणेशाहीचा वाद उग्र होताना दिसतो आहे. शिवसेनेच्या (शिंदे गट) माजी महापौर मीनाक्षी शिंदे यांनी सुरू केलेली नाराजी आता थेट खासदार नरेश म्हस्के यांच्या घरापर्यंत पोहोचली आहे. विशेष म्हणजे, खासदार होण्यापूर्वी नगरसेवक म्हणून ज्या प्रभागाचे नरेश म्हस्के प्रतिनिधित्व करत होते, त्यातून आता त्यांचा मुलगा आशुतोष उमेदवारीसाठी तयार होत असल्याचे संकेत मिळाले आहेत. मात्र शिवसेनेतील (शिंदे गट)कार्यकर्त्यांनी याला उघड विरोध असल्याने पक्षांतर्गत अस्वस्थता निर्माण झाली आहे.
काही दिवसांपूर्वी मनोरमानगर भागातदेखील भोईर कुटुंबाविरोधात बंड उभे राहिले होते. शिंदे गटाने विरोध करणाऱ्या शाखाप्रमुखावर शिस्तभंगाची कारवाई केली होती. त्यानंतर मीनाक्षी शिंदे यांनी महिला जिल्हा संघटक पदाचा राजीनामा देऊन नाराजीची ठिणगी पेटवली, जी आता अनेक प्रभागांमध्ये पसरू लागली आहे. शनिवारी रात्री कोपरी आनंदनगर येथेही अशाच प्रकारची घटना घडल्याने खासदार नरेश म्हस्के यांना आव्हान उभे राहिले आहे.
