मुंबई : दक्षिणात्य सिनेसृष्टीतील सुपरस्टार थलापती विजयने अभिनय क्षेत्रातून बाहेर पडण्याचा मोठा निर्णय घेतला आहे. विजयचा शेवटचा चित्रपट ‘जाना नायकन’ असून तो ९ जानेवारी २०२६ रोजी प्रदर्शित होणार आहे. २७ डिसेंबर रोजी मलेशियामध्ये झालेल्या या चित्रपटाच्या ऑडिओ लॉन्च कार्यक्रमात विजय भावूक झाला आणि हा त्याचा शेवटचा चित्रपट असल्याचं त्याने स्पष्ट केलं.
अभिनयाला रामराम करत विजयने आता पूर्णपणे राजकारणावर लक्ष केंद्रित करण्याचा निर्णय घेतला आहे. गेल्या वर्षी त्याने ‘तमिलागा वेट्टी कझगम’ या राजकीय पक्षाची स्थापना केली होती. आगामी तामिळनाडू विधानसभा निवडणुकीत उतरण्याची तयारी तो करत आहे.
राजकारणात प्रवेशाबाबत बोलताना विजय म्हणाला, “माझ्यासाठी फक्त एकच गोष्ट महत्त्वाची आहे. लोक मला पाहण्यासाठी थिएटरबाहेर रांगेत उभे राहतात. म्हणूनच पुढील ३० ते ३३ वर्षे मी त्यांच्यासाठी रांगेत उभा राहण्यास तयार आहे.” तो पुढे म्हणाला, “चित्रपटसृष्टीत आलो तेव्हा वाळूचा किल्ला बांधण्याचं स्वप्न होतं, पण चाहत्यांनी मला राजवाडा दिला.”
एच. विनोद दिग्दर्शित ‘जाना नायकन’ चित्रपटात बॉबी देओल, पूजा हेगडे, ममिता बैजू, गौतम वासुदेव मेनन, प्रकाश राज आणि प्रियामणी यांच्याही प्रमुख भूमिका आहेत. थलापतीने ‘मास्टर’, ‘लिओ’, ‘मर्सल’, ‘थेरी’, ‘बिस्ट’ यांसारख्या अनेक गाजलेल्या चित्रपटांतून चाहत्यांच्या मनावर कायमच नाव कोरल आहे.